ءىس-شارادا العىس ايتۋ كۇنىمەن قۇتتىقتاعان اتىراۋ وبلىسىنىڭ اكىمى ماحامبەت دوسمۇحامبەتوۆ ءوڭىر حالقىنا العىس ايتتى.
– قۇرمەتتى جەرلەستەر، سىزدەرگە مىڭ العىس! بۇگىن بىرنەشە ماڭىزدى داتالار توعىسقان كۇن. 1 ناۋرىز – تەك «العىس ايتۋ» مەرەكەسى عانا ەمەس، قازاقستان حالقى اسسامبلەياسى مەن «Nur Otan» پارتياسىنىڭ دا قۇرىلعان كۇنى. سوندىقتان دا ماڭىزدى كۇننىڭ مارتەبەسى ءاردايىم ارتا بەرسىن!
اتالعان قۇرىلىمدار تاۋەلسىزدىكتىڭ تۇعىرلى بولۋى ءۇشىن ەرەكشە ءرول اتقاردى. ولاردىڭ مەملەكەت ساياساتىن جۇرگىزۋدەگى، سونداي-اق ەلدەگى بەيبىتشىلىك پەن كەلىسىمدى نىعايتۋداعى الار ورنى ەرەكشە، – دەگەن ماحامبەت دوسمۇحامبەتوۆ بيىل تاۋەلسىزدىگىمىزدىڭ 30 جىلدىعى اياسىندا قايىرىمدىلىق مارافونى باستالعانىن جانە بارشا اتىراۋلىقتاردى وسى يگى ىسكە اتسالىسۋعا شاقىردى.
سونىمەن قاتار، وتكەن جىل كۇللى الەم ءۇشىن دە، ەلىمىز ءۇشىن دە كۇردەلى سىناقتارعا تولى بولعانىنا توقتالعان ءوڭىر باسشىسى توتەنشە جاعداي كەزىندە اتىراۋلىقتار قايىرىمدىلىقتىڭ جارقىن ۇلگىسىن كورسەتكەنىن ريزاشىلىقپەن اتاپ ءوتتى. سوسىن ءبىرقاتار ءىرى كومپانياعا، مەديسينا مەن الەۋمەتتىك سالا قىزمەتكەرلەرى، قۇقىق قورعاۋ ورگانى وكىلدەرى، ەرىكتىلەر، مەسەناتتار سونداي-اق مۇعالىمدەر جانە وزگە دە اتسالىسقاندارعا ارنايى ريزاشىلىعىن جەتكىزدى.
ءوز كەزەگىندە قازاقستان حالقى اسسامبلەياسىنىڭ اتىراۋ وبلىسىنداعى ەتنومادەني ورتالىعى «تحونيل» كارىس ەتنومادەني بىرلەستىگىنىڭ جەتەكشىسى ليۋدميلا ۆالەنتينوۆنا اسسامبلەياسىنىڭ نەگىزىن قالاعان ەلباسىنا، ىنتىماعى جاراسقان قازاقستان حالقىنا العىس ايتتى.
اتالعان ءىس-شارا شەڭبەرىندە قالا سونداي-اق اۋدان اكىمدەرى جەرگىلىكتى كاسىپكەرلەر ارقىلى از قامتىلعان 700 وتباسىنى جىلدىق ازىق-تۇلىكپەن قامتاماسىز ەتۋ ءۇشىن العاشقى سەرتيفيكاتتار تابىس ەتىلەتىنىن حابارلادى. ال ونداعان جىل ءبىر بومەلى ۇيدە تۇرىپ كەلگەن جەتى بالالى وتباسىعا دەمەۋشىلىك ارقىلى اتىراۋ قالاسىنان 2 بولمەلى پاتەردىڭ كىلتى بەرىلدى.
سونىمەن قاتار، «اتامەكەن ۇلتتىق كاسىپكەرلەر پالاتاسى جانىنداعى «اتىراۋ وبلىسى ىسكەر ايەلدەر قاۋىمداستىعى» ءتورايىمى گۇلجان مۇحاتايەۆا ەكى ءجاسوسپىرىمنىڭ ەمىنە جانە مۇمكىندىگى شەكتەۋلى مەديسينا قىزمەتكەرىنە قارجىلاي قولداۋ ءبىلدىرىپ، سەرتيفيكاتتار تابىستادى.
ال، قايىرىمدىلىق مارافونى شەڭبەرىندە وبلىستىق ىشكى ساياسات باسقارماسىنىڭ ۇجىمى ونكولوگيالىق سىرقاتپەن اۋىراتىن بالالار ءۇشىن وبلىستىق بالالار اۋرۋحاناسىنا 5 دانا پلانشەت تابىس ەتتى.
