بۇل تۋرالى وكق-نىڭ باسپا ءسوز الاڭىندا وتكەن ونلاين-بريفينگتە №2 اتىراۋ وبلىستىق اۋرۋحاناسىنىڭ COVID-19 بولىمشەسىنىڭ مەڭگەرۋشىسى نۇرفيا قيزاتوۆا مالىمدەدى.
– ءموبيلدى بريگادا ماماندارى چەك-پاراقتار ارقىلى اۋرۋ اعىمىنىڭ اۋىرلىعىنا بايلانىستى ناۋقاستى اۋرۋحاناعا جاتقىزۋ تۋرالى شەشىم قابىلداي الادى. مۇنداي شەشىم دەنە قىزۋىنىڭ كوتەرىلۋى، ەنتىگۋ سەكىلدى بەلگىلەر بولعاندا عانا ەمەس، ناۋقاستاعى قوسىمشا اۋرۋلاردىڭ جانە ادام ومىرىنە ءقاۋىپ توندىرەتىن فاكتورلار نەگىزىندە قابىلدانادى، – دەدى نۇرفيا قيزاتوۆا.
ماماننىڭ ايتۋىنشا، كوروناۆيرۋس جۇقپاسى جرۆي (جەدەل رەسپيراتورلى ۆيرۋستىق ينفەكسيا) ينفەكسياسىمەن قاباتتاسىپ كەلۋى مۇمكىن. سول سەبەپتى، COVID-19 جۇقپاسىنىڭ سيمپتومسىز تۇرىنە شالدىققان ناۋقاس مەديسينا مامانىنىڭ باقىلاۋىنسىز قالماۋى ءتيىس. بۇل رەتتە – مەديسينا مامانىنىڭ كومەگىمەن ناۋقاستىڭ ءوزى تولتىراتىن چەك-پاراقتىڭ ماڭىزى زور.
بۇدان بولەك، №2 اتىراۋ وبلىستىق اۋرۋحاناسىنىڭ ديرەكتورى ماعجان سيدجانوۆ وبلىس تۇرعىندارىنان ءقاۋىپتى ىندەتتىڭ الدىن الۋ شارالارىنان حاباردار بولۋدى جانە ادام كوپ شوعىرلاناتىن جەرلەرگە بارماۋدى سۇرادى.
– مەكتەپ وقۋشىلارى كەزەكشى سىنىپتارداعى ساباعىنا كىرىستى. اتا-انالاردان بالالارىن قورعاۋدى سۇرايمىز. بالالاردىڭ جاي-كۇيى تۋرالى ۇنەمى حاباردار بولىڭىزدار، دەنە قىزۋى كوتەرىلگەن جاعدايدا مەكتەپكە جىبەرمەگەندەرىڭىز ءجون. پاندەميا كەزەڭىندە باسقا دا ينفەكسيالىق اۋرۋلاردىڭ الدىن الۋ ماقساتىندا جوسپارلى ەكپەلەردى الۋ ءۇشىن ەمحاناعا ۋاقتىلى بارۋ كەرەكتىگىن دە ەسكەرتەمىن، – دەدى ماعجان سيدجانوۆ.
