Bul týraly ÓKQ-niń baspasóz alańynda ótken onlain-brifingte №2 Atyraý oblystyq aýrýhanasynyń COVID-19 bólimshesiniń meńgerýshisi Nurfiia Qizatova málimdedi.
– Mobildi brigada mamandary chek-paraqtar arqyly aýrý aǵymynyń aýyrlyǵyna bailanysty naýqasty aýrýhanaǵa jatqyzý týraly sheshim qabyldai alady. Mundai sheshim dene qyzýynyń kóterilýi, entigý sekildi belgiler bolǵanda ǵana emes, naýqastaǵy qosymsha aýrýlardyń jáne adam ómirine qaýip tóndiretin faktorlar negizinde qabyldanady, – dedi Nurfiia Qizatova.
Mamannyń aitýynsha, koronavirýs juqpasy JRVI (jedel respiratorly virýstyq infektsiia) infektsiiasymen qabattasyp kelýi múmkin. Sol sebepti, COVID-19 juqpasynyń simptomsyz túrine shaldyqqan naýqas meditsina mamanynyń baqylaýynsyz qalmaýy tiis. Bul rette – meditsina mamanynyń kómegimen naýqastyń ózi toltyratyn chek-paraqtyń mańyzy zor.
Budan bólek, №2 Atyraý oblystyq aýrýhanasynyń direktory Maǵjan Sidjanov oblys turǵyndarynan qaýipti indettiń aldyn alý sharalarynan habardar bolýdy jáne adam kóp shoǵyrlanatyn jerlerge barmaýdy surady.
– Mektep oqýshylary kezekshi synyptardaǵy sabaǵyna kiristi. Ata-analardan balalaryn qorǵaýdy suraimyz. Balalardyń jai-kúii týraly únemi habardar bolyńyzdar, dene qyzýy kóterilgen jaǵdaida mektepke jibermegenderińiz jón. Pandemiia kezeńinde basqa da infektsiialyq aýrýlardyń aldyn alý maqsatynda josparly ekpelerdi alý úshin emhanaǵa ýaqtyly barý kerektigin de eskertemin, – dedi Maǵjan Sidjanov.
