كاسىپكەرلەردىڭ مۇددەلەرىن قورعاۋ، شاعىن جانە ورتا بيزنەسكە قاتىستى زاڭنامالىق جانە نورماتيۆتىك قاعيدالاردى قالىپتاستىرۋ، ىسكەرلىك جانە ينۆەستيسيالىق احۋالدى جاقسارتۋ ماقساتىن كوزدەگەن «اتامەكەن» ۇلتتىق كاسىپكەرلەر پالاتاسى وڭىرلەردەگى جۇمىستى باستاپ كەتتى. جوبا اياسىندا جاڭاوزەن قالاسىنداعى شاعىن جانە ورتا بيزنەس وكىلدەرى، الەۋەتتى كاسىپكەرلەر جانە جاستارمەن كەزدەسۋ ءۇشىن ارنايى مامانداندىرىلعان ءموبيلدى توپ قۇرىلدى. ايتا كەتەيىك، بۇل جوبا – حالىقتى كاسىپكەرلىككە تارتۋدى كوزدەيدى.
جۇمىس توبى قۇرامىنا تاجىريبەلى باسشىلار مەن ماڭعىستاۋ، اقتوبە، اتىراۋ جانە وڭتۇستىك قازاقستان وبلىستارىندا ورنالاسقان وڭىرلىك كاسىپكەرلەر پالاتالارىنىڭ ساراپشىلارى، «ماڭعىستاۋ» كاسىپكەرلەرگە قىزمەت كورسەتۋ ورتالىعى باسشىلىعى، سونداي-اق، «اتامەكەن» ۇكپ ورتالىق اپپاراتىنان سالالىق دەپارتامەنتتەر وكىلدەرى كىردى.
مۇندا كاسىپكەرلىكتى اشۋ جانە ءتيىمدى جۇرگىزۋ، قارجىلىق ساۋاتتىلىق، تەندەرلەرگە قاتىسۋ، بيزنەستى جۇرگىزۋدەگى ينفاقۇرىلىمنىڭ قولجەتىمدىلىگى، زاڭ، سالىق ماسەلەلەرىنە قاتىستى كۇندەلىكتى جان-جاقتى كەڭەس، سۇيەمەلدەۋ جانە اقپاراتتىق-ادىستەمەلىك كومەك كورسەتىلمەك. ارنايى ماماندىرىلعان توپ كاسىپكەرلەردىڭ سوت ىستەرىن قاراۋ، ونىڭ ىشىندە قۇقىقتارى مەن مۇددەلەرىن قورعاۋ بويىنشا كەشەندى جۇمىس اتقارۋدى مەجەلەپ وتىر. جوبا اياسىندا جۇمىسپەن قامتۋ جونىندە كاسىپتىك-تەحنيكالىق وقىتۋ، قايتا دايارلاۋ ماسەلەلەرى قاراستىرىلعان.
جاڭاوزەن اقتاۋ قالاسىنان 150 شاقىرىم قاشىقتىقتا ورنالاسقان، 142 مىڭ تۇرعىنى بار شاعىن قالا. قالا قۇرامىنا تەڭگە، راحات، قىزىلساي اتتى ەلدىمەكەندەر كىرەدى. وڭىردە تىركەۋدە تۇرعان 6510 كاسىپكەر بار. ولاردىڭ كاسىبىن دامىتۋ تۋرالى وي-جوسپارلارىمەن كۇندەلىكتى جۇمىس ىستەلىنبەك. بۇل رەتتە، اكىمشىلىك كەدەرگىلەر، سالىق جۇكتەمەسى، جەر تاپشىلىعى، تاعى باسقا تۇيتكىلدەر جوق ەمەس. بارعان توپتىڭ نەگىزگى مىندەتى – وسى كاسىپكەرلەرمەن كەزدەسۋ ارقىلى جاڭاوزەن كاسىپكەرلەرىنىڭ ماسەلەلەرى كارتاسىن جاساقتاپ، اتقارۋشى ورگاندارمەن بىرلەسكەن رايدا تەز ارادا شەشىمىن تابۋ.
«باعدارلامانى تەك قانا تانىستىرۋ نەمەسە ءتۇسىندىرىپ كەتۋ از بولادى. ءقازىر ەلىمىزدەگى ازاماتتاردىڭ كوزى اشىق، قالاي جۇمىس جاساۋ كەرەكتىگىن حالقىمىز بىلەدى. ەندى سونىڭ تەتىگىن كورسەتىپ جىبەرۋ كەرەك. باعدارلامانىڭ تۇرلەرى كوپ، الايدا ءىس جۇزىندە سالىق ماسەلەسى بار، قاعاز ماسەلەسى بار، قاي جەرگە وتكىزۋ، قانداي نەسيە الۋ كەرەك دەگەن كوپتەگەن ماسەلەلەر جولىعادى. جوبا «اتامەكەن» ۇكپ ءتورالقا ءتوراعاسى تيمۋر قۇلىبايەۆتىڭ تىكەلەي باستاماسىمەن قولعا الىندى جانە ارنايى جۇمىس توبى قۇرىلدى. ونىڭ اياسىندا الداعى ۋاقىتتا كاسىپكەرلەرگە تولىققاندى قىزمەت كورسەتۋدى موينىمىزعا الىپ وتىرمىز»، – دەيدى ءموبيلدى توپتىڭ باسى-قاسىندا جۇرگەن «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ.
17 قازاننان باستاپ جوبا نەگىزىندە بيزنەس-ورتانى جاقسارتۋ جانە دامىتۋ بويىنشا ءبىرقاتار ءىس-شارالار كوزدەلگەن. وڭىردە «Bastau بيزنەس» جانە «Bastau كاسىپ» جوبالارى ىسكە قوسىلادى. «Bastau بيزنەس» ارقىلى ءوزىن-وزى قامتىعان جانە ءىسىن جاڭا باستاعان جۇمىسسىز تۇلعالارعا كاسىپكەرلىك بەلسەندىلىگىن ارتتىرۋ بويىنشا وقىتۋ جۇمىستارى جۇرگىزىلەدى. «Bastau كاسىپ» جوباسى اياسىندا جۇمىسشى كاسىپتەر بويىنشا جۇمىسسىز جاندار وقىتىلادى. بۇل جوبا تىكەلەي جاستارعا باسىمدىق بەرەدى. مەكتەپتى ءبىتىرىپ، جوعارى وقۋعا تۇسپەي قالعان جاسوسپىرىمدەردى بەلگىلى ءبىر كاسىپكە ماشىقتاندىرۋ، جۇمىس ورنىن تابۋعا اتسالىسۋ مۇرات ەتىلگەن.
«بۇگىننەن باستاپ «جاڭاوزەنگە – جاڭا سەرپىن» جوباسىن جۇزەگە اسىرۋ، كاسىپكەرلەرگە كەڭەس بەرۋ ورتالىعىن قۇرۋ بويىنشا جۇمىستارىنىڭ ناتيجەلى بولاتىنىنا سەنەمىز. بۇل قادامدارعا ءبىزدىڭ تاراپىمىزدان بارلىق قولداۋلار كورسەتىلەتىن بولادى. «اتامەكەن» ماماندارىمەن جەرگىلىكتى مەملەكەتتىك مەكەمەلەردىڭ قىزمەتكەرلەرى جانە ءتيىستى قۇزىرەتتى ورگانداردىڭ باسشىلارى بىرىگىپ جۇمىس ىستەيدى»، – دەيدى جاڭاوزەن قالاسىنىڭ اكىمى ەلۋباي ءابىلوۆ.
جالپى بيزنەس-ورتانى جاقسارتۋ جانە دامىتۋ جونىندەگى «جاڭاوزەنگە – جاڭا سەرپىن» باعدارلاماسى بويىنشا شامامەن 30-دان اسا ءىس-شارا جوسپارلانعان.
