Kásipkerlerdiń múddelerin qorǵaý, shaǵyn jáne orta bizneske qatysty zańnamalyq jáne normativtik qaǵidalardy qalyptastyrý, iskerlik jáne investitsiialyq ahýaldy jaqsartý maqsatyn kózdegen «Atameken» Ulttyq kásipkerler palatasy óńirlerdegi jumysty bastap ketti. Joba aiasynda Jańaózen qalasyndaǵy shaǵyn jáne orta biznes ókilderi, áleýetti kásipkerler jáne jastarmen kezdesý úshin arnaiy mamandandyrylǵan mobildi top quryldy. Aita keteiik, bul joba – halyqty kásipkerlikke tartýdy kózdeidi.
Jumys toby quramyna tájiribeli basshylar men Mańǵystaý, Aqtóbe, Atyraý jáne Ońtústik Qazaqstan oblystarynda ornalasqan óńirlik kásipkerler palatalarynyń sarapshylary, «Mańǵystaý» kásipkerlerge qyzmet kórsetý ortalyǵy basshylyǵy, sondai-aq, «Atameken» UKP ortalyq apparatynan salalyq departamentter ókilderi kirdi.
Munda kásipkerlikti ashý jáne tiimdi júrgizý, qarjylyq saýattylyq, tenderlerge qatysý, biznesti júrgizýdegi infaqurylymnyń qoljetimdiligi, zań, salyq máselelerine qatysty kúndelikti jan-jaqty keńes, súiemeldeý jáne aqparattyq-ádistemelik kómek kórsetilmek. Arnaiy mamandyrylǵan top kásipkerlerdiń sot isterin qaraý, onyń ishinde quqyqtary men múddelerin qorǵaý boiynsha keshendi jumys atqarýdy mejelep otyr. Joba aiasynda jumyspen qamtý jóninde kásiptik-tehnikalyq oqytý, qaita daiarlaý máseleleri qarastyrylǵan.
Jańaózen Aqtaý qalasynan 150 shaqyrym qashyqtyqta ornalasqan, 142 myń turǵyny bar shaǵyn qala. Qala quramyna Teńge, Rahat, Qyzylsai atty eldimekender kiredi. Óńirde tirkeýde turǵan 6510 kásipker bar. Olardyń kásibin damytý týraly oi-josparlarymen kúndelikti jumys istelinbek. Bul rette, ákimshilik kedergiler, salyq júktemesi, jer tapshylyǵy, taǵy basqa túitkilder joq emes. Barǵan toptyń negizgi mindeti – osy kásipkerlermen kezdesý arqyly Jańaózen kásipkerleriniń máseleleri Kartasyn jasaqtap, atqarýshy organdarmen birlesken raida tez arada sheshimin tabý.
«Baǵdarlamany tek qana tanystyrý nemese túsindirip ketý az bolady. Qazir elimizdegi azamattardyń kózi ashyq, qalai jumys jasaý kerektigin halqymyz biledi. Endi sonyń tetigin kórsetip jiberý kerek. Baǵdarlamanyń túrleri kóp, alaida is júzinde salyq máselesi bar, qaǵaz máselesi bar, qai jerge ótkizý, qandai nesie alý kerek degen kóptegen máseleler jolyǵady. Joba «Atameken» UKP Tóralqa Tóraǵasy Timýr Qulybaevtyń tikelei bastamasymen qolǵa alyndy jáne arnaiy jumys toby quryldy. Onyń aiasynda aldaǵy ýaqytta kásipkerlerge tolyqqandy qyzmet kórsetýdi moinymyzǵa alyp otyrmyz», – deidi mobildi toptyń basy-qasynda júrgen «Atameken» Ulttyq kásipkerler palatasynyń Basqarma Tóraǵasy Abylai Myrzahmetov.
17 qazannan bastap joba negizinde biznes-ortany jaqsartý jáne damytý boiynsha birqatar is-sharalar kózdelgen. Óńirde «Bastau Biznes» jáne «Bastau Kásip» jobalary iske qosylady. «Bastau Biznes» arqyly ózin-ózi qamtyǵan jáne isin jańa bastaǵan jumyssyz tulǵalarǵa kásipkerlik belsendiligin arttyrý boiynsha oqytý jumystary júrgiziledi. «Bastau Kásip» jobasy aiasynda jumysshy kásipter boiynsha jumyssyz jandar oqytylady. Bul joba tikelei jastarǵa basymdyq beredi. Mektepti bitirip, joǵary oqýǵa túspei qalǵan jasóspirimderdi belgili bir kásipke mashyqtandyrý, jumys ornyn tabýǵa atsalysý murat etilgen.
«Búginnen bastap «Jańaózenge – jańa serpin» jobasyn júzege asyrý, Kásipkerlerge keńes berý ortalyǵyn qurý boiynsha jumystarynyń nátijeli bolatynyna senemiz. Bul qadamdarǵa bizdiń tarapymyzdan barlyq qoldaýlar kórsetiletin bolady. «Atameken» mamandarymen jergilikti memlekettik mekemelerdiń qyzmetkerleri jáne tiisti quzyretti organdardyń basshylary birigip jumys isteidi», – deidi Jańaózen qalasynyń ákimi Elýbai Ábilov.
Jalpy biznes-ortany jaqsartý jáne damytý jónindegi «Jańaózenge – jańa serpin» baǵdarlamasy boiynsha shamamen 30-dan asa is-shara josparlanǵan.
