وتىرىستا مەملەكەت باسشىسى، «AMANAT» پارتياسىنىڭ ءتوراعاسى قاسىم-جومارت كەمەل ۇلى توقايەۆتىڭ العا قويعان مىندەتتەرىن ىسكە اسىرۋ ماسەلەسى قارالدى.
– ەل پرەزيدەنتى قاسىم-جومارت كەمەل ۇلى توقايەۆ جاڭا قازاقستاندى قۇرۋدىڭ كەشەندى، جان-جاقتى پىسىقتالعان باعدارلاماسىن ۇسىندى. مەملەكەت باسشىسى ەلدەگى ساياسي مادەنيەتتى قالىپتاستىرۋعا مۇلدەم جاڭاشا رەڭك بەردى. ەلىمىز تاۋەلسىزدىكتىڭ وتىز جىلى ىشىندە وتكەندى قۇرمەتتەپ، دامۋدىڭ جاڭا ساتىسىنا كوشىپ، تۇبەگەيلى ساياسي ترانسفورماسيا الدىندا تۇر. الداعى بارلىق وزگەرىستەردىڭ نەگىزگى لەيتموتيۆى – مەملەكەت پەن قوعام اراسىنداعى ءوزارا تۇسىنىستىك پەن سەنىم. وسى تۇرعىدا پارتيا مەن فراكسيا مۇشەلەرىنە زور جاۋاپكەرشىلىك جۇكتەلىپ وتىر، – دەدى ەرلان قوشانوۆ.
وتىرىستا ءسوز سويلەگەن «AMANAT» پارتياسىنىڭ اتقارۋشى حاتشىسى اسحات ورالوۆ جولداۋدىڭ باسىم باعىتتارىنا توقتالىپ، پارتيا ەل پرەزيدەنتىنىڭ ينستيتۋسيونالدىق تىرەگى بولا وتىرىپ، بارلىق جۇرگىزىلىپ جاتقان رەفورمالاردىڭ الدىڭعى قاتارىندا بولۋعا ءتيىس ەكەنىن ايتتى.
– مەملەكەت باسشىسىنىڭ جولداۋىن اۋقىمدى تۇردە ىلگەرىلەتۋ جانە ىسكە اسىرۋ ءۇشىن بارلىق پارتيالىق رەسۋرستاردى جۇمىلدىرۋ ماڭىزدى. بۇل جۇمىسقا ءماجىلىس پەن ءماسليحاتتاردىڭ بارلىق دەپۋتاتتارى، بيۋرو مەن ساياسي كەڭەستەردىڭ، قوعامدىق كەڭەستەردىڭ مۇشەلەرى، پارتيانىڭ بەلسەندىلەرى مەن جاقتاستارى، قوعامدىق پىكىر كوشباسشىلارى، جاستار تارتىلۋعا ءتيىس، – دەدى پارتيانىڭ اتقارۋشى حاتشىسى.
ودان ءارى فراكسيا جيىنىندا دەپۋتاتتار ءسوز سويلەپ، پىكىر الىستى.
دەپۋتات ەرلان سايروۆ تاۋەلسىز قازاقستاننىڭ ساياسي تاريحىندا وسىنداي شەشۋشى كەزەڭ كوپ بولماعانىن، جاڭا قازاقستاننىڭ قالىپتاسىپ جاتقانىنا نازار اۋداردى.
– قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ەلىمىزدى دەموكراتيا مەن ءپليۋراليزمنىڭ جولىنا باعىتتادى! حالقىمىزدىڭ، قوعامنىڭ كوكەيىندە جۇرگەن، ازاماتتىق بەلسەندىلەر تالقىلاپ جاتقان ماسەلەگە ناقتى جاۋاپ بەرىلدى! قازاقستاندا جۇيەلى، تەرەڭ، جان-جاقتى قوعامدىق-ساياسي رەفورما ىسكە اسادى! بۇل اسپەكت بىزگە، «AMANAT» پارتياسىنىڭ فراكسيا مۇشەلەرىنە زور جۇكتەيدى! – دەدى دەپۋتات.
ءوز كەزەگىندە ءماجىلىس دەپۋتاتى جۇلدىز سۇلەيمەنوۆا مەملەكەت باسشىسى ۇسىنعان رەفورمالار «جاڭا قازاقستان» قۇرۋدا ەلىمىزدىڭ بۇگىنگى ساياسي جۇيەسىن تۇبەگەيلى قايتا جاڭعىرتىپ، اشىقتىعىن، تيمدىلىگىن جانە الەۋمەتتىك دامۋىن ارتتىرا تۇسەتىندىگىنە توقتالدى.
– جولداۋ جۇكتەگەن اۋقىمدى مىندەتتەر قاتارىندا اباي وبلىسىنىڭ «رۋحاني جانە مادەني ورتالىعىمىز» رەتىندە دامىتۋعا باسىمدىق بەرۋىمىز قاجەت. ءبىزدى ۇلت رەتىندە ساقتايتىن كەمەڭگەر اباي قۇنانباي ۇلى، ويشىل شاكارىم قۇدايبەردى ۇلى، زاڭعار جازۋشىمىز مۇحتار اۋەزوۆتىڭ مۇرالارىن زەردەلەپ، اعارتۋشىلارىمىز الاش زيالىلارىنىڭ ەڭبەكتەرىندەگى ادامزاتقا جات قاتىگەزدىك، مەنمەندىك، ماسىلدىق، ەرىنشەكتىك سەكىلدى مىنەزدەردەن بويىمىزدى تاسالاپ، اقپارات تاسقىنى مەن عالامدانۋ كۇشىنە توتەپ بەرەتىن مەيىرىمدىلىك، ىزگىلىك، كىشىپەيىلدىلىك پەن ەڭبەكقورلىق سەكىلدى تەمىرقازىق ۇستانىمداردى جاستارعا ناسيحاتتاۋدى قولعا الۋ قاجەت، – دەدى دەپۋتات.
سونداي-اق جۇلدىز سۇلەيمەنوۆا ۇلىتاۋ وبلىسىندا يننوۆاسيالىق جاستار دامىتۋ ورتالىقتارىن اشۋ، سول نەگىزدە كرەمنيي اڭعارىنداي ءبىلىم، عىلىم، ونەركاسىپ پەن كرەاتيۆتى يندۋستريانى دامىتۋ NEET ساناتىنداعى جاستارىمىزعا بولسىن، جالپى ەڭبەك قوعامىن قۇرۋدا وزەكتى ەكەنىنە نازار اۋداردى.
جيىن بارىسىندا دەپۋتاتتار سنەجاننا يماشيەۆا، البەرت راۋ، قانات نۇروۆ زاڭ شىعارۋشىلىق جۇمىستىڭ ساپاسى، ءماجىلىس جۇمىسىنا ساراپشىلار مەن جۇرتشىلىقتى تارتۋ، پارلامەنتاريزم ينستيتۋتىن جوبالاردى قاراۋعا تارتۋ، داعدارىسقا قارسى شارالار پاكەتىن قابىلداۋ جانە جەرگىلىكتى ءوزىن-وزى باسقارۋ مەن مەملەكەتتىك باسقارۋ قۇزىرەتتەرىنىڭ ءبولىنۋى جانە تاعى باسقا دا ءبىرقاتار وزەكتى ماسەلەلەردى كوتەردى.
ءماجىلىس ءتوراعاسى وتىرىستا دەپۋتاتتاردىڭ ۇكىمەتپەن ءوزارا ءىس-قيمىل جاساۋدىڭ جاڭا فورماتىنا كوشىپ جاتقانىن اتاپ ءوتتى.
– جۋىردا وتكەن ءماجىلىستىڭ جالپى وتىرىسىندا قاڭتار وقيعاسىنىڭ تەرگەلۋ بارىسى جونىندە قۇقىق قورعاۋ ورگاندارى باسشىلارىنىڭ ەسەبى تىڭدالدى. وعان مەملەكەت باسشىسى وڭ باعا بەردى. سوندىقتان مۇنداي فورماتتاعى جۇمىستى ءارى قاراي جالعاستىرۋىمىز كەرەك، – دەدى ەرلان قوشانوۆ.
پالاتا سپيكەرى اقپانداعى وڭىرلەرگە جاسالعان ساپارلاردىڭ قورىتىندىسى بويىنشا دەپۋتاتتار مىڭنان استام تۇيتكىلدى ماسەلەلەردى توپتاستىرعانىنا ءمان بەردى. وسى ماسەلە بويىنشا جۋىق ارادا پرەمەر-مينيستردىڭ ورىنباسارى جانە ۇكىمەت مۇشەلەرىنىڭ قاتىسۋىمەن ءماجىلىستىڭ جالپى وتىرىسى وتەتىنىن، وندا قابىلدانىپ جاتقان شارالار بويىنشا ەسەپ تىڭدالاتىنىن اتاپ ءوتتى.
