مەجٸلٸس دەپۋتاتى اسحات ايماعامبەتوۆ زەينەتاقى اننۋيتەتٸ جٷيەسٸنە قاتىستى ماڭىزدى ٶزگەرٸس ەنگٸزٸلگەنٸن حابارلادى, دەپ جازادى dalanews.kz.
دەپۋتاتتىڭ ايتۋىنشا, جاڭادان قابىلدانعان زاڭدا زەينەتاقى اننۋيتەتٸ بويىنشا مۇراگەرلەردٸڭ قۇقىعىن كەڭەيتەتٸن تٷزەتۋ بار. بۇل ٶزگەرٸس رەسمي تٷردە كٷشٸنە ەنەدٸ.
بۇعان دەيٸن زەينەتاقى اننۋيتەتٸن رەسٸمدەگەن ادام قايتىس بولعان جاعدايدا, ونىڭ شوتىندا قالعان قاراجات مۇراگەرلەرٸنە تولىق كٶلەمدە بٸردەن بەرٸلمەيتٸن. وتباسى مٷشەلەرٸ بۇل اقشانى تەك اي سايىنعى تٶلەم تٷرٸندە, ۇزاق جىلدار بويى بٶلٸپ الىپ كەلگەن.
"كەشە قابىلدانعان زاڭنىڭ ٸشٸندە بٸز ۇسىنعان ماڭىزدى تٷزەتۋ بار. ول رەسمي تٷردە كٷشٸنە ەنەدٸ. بۇرىن زەينەتاقى اننۋيتەتٸن الىپ جٷرگەن ادام قايتىس بولسا, ونىڭ جيناعان اقشاسى ارتىندا قالعان وتباسىنا تولىق بەرٸلمەيتٸن. مۇراگەرلەرٸ ول اقشانى تەك اي سايىن, تيىن-تەبەندەپ, جىلدارعا سوزىلىپ قانا الا الاتىن. قالعان بٷكٸل اقشاسىن, بٸردەن الۋ زاڭ جٷزٸندە مٷمكٸن ەمەس ەدٸ. ەندٸ بٸز بۇل ەرەجەنٸ ٶزگەرتتٸك. وتباسىلارعا تاڭداۋ بەردٸك. ەگەر زەينەتاقى اننۋيتەتٸ بويىنشا شوتتا اقشا قالسا, مۇراگەرلەر ونى بۇرىنعىداي اي سايىن بٶلٸپ الۋدى جالعاستىرا بەرەدٸ نەمەسە قالعان بارلىق سومانى بٸر-اق كٷندە, بٸردەن تولىق الىپ كەتە الادى. بۇرىنعىداي تەك بٸر عانا قاتال شەكتەۋ جوق, تاڭداۋ – وتباسىنىڭ ٶز قولىندا. بٸز زەينەتاقى اننۋيتەتٸ جٷيەسٸن ادامدارعا ىڭعايلى ەرٸ يكەمدٸ ەتتٸك", – دەپ جازدى اسحات ايماعامبەتوۆ.
