قىرعىزستاندا "قىس بولمايدى" دەگەن ءسوزى ارقىلى تانىلعان ارستان الاي قاڭتاردىڭ باسىندا وز-وزىنە قول جۇمساعان بولاتىن. ەلدىڭ باس پروكۋرورى قۇرمانقۇل زۋلۋشيەۆ ونىڭ ءولىمى بويىنشا تەرگەۋ ءجۇرىپ جاتقانىن مالىمدەدى، - دەپ حابارلايدى Dalanews.kz.
"ولار (تۇرمە اكىمشىلىگى قىزمەتكەرلەرى – ەسك.) ارىستان الاي ۇتىكتىڭ ەلەكتر باۋىن باسىپ جۇرگەنىن، سۋ، ءشاي ءىشىپ جۇرگەنىن 24 ساعات بويى كورگەن. كورگەن دە، شارا قولدانباعان. ول جاقتا ىستەگەن قىز جاس ەكەن، بارعانىنا جەتى اي بولىپتى. وعان ءتۇسىندىرۋ جۇمىسى جۇرگىزىلمەگەن. سوندىقتان "سالعىرتتىق" بابى بويىنشا ءىس قوزعالىپ، تەرگەۋ ءجۇرىپ جاتىر"، - دەپ كەلتىردى زۋلۋشيەۆتىڭ ءسوزىن "ازاتتىق راديوسى".
5 قاڭتاردا ساعات 05.15 شاماسىندا جازانى وتەۋ قىزمەتىنىڭ №31 ارنايى ەمدەۋ-تۇزەۋ مەكەمەسىنىڭ اسحاناسىندا ايىپتالۋشى ارستانبەك بەيشەنالي ۇلى ابدىلدايەۆ اسىلعان كۇيىندە تابىلعان ەدى. وكتيابر اۋداندىق سوتى ارستانبەك ابدىلدايەۆقا قاتىستى 2023 جىلعى 16 جەلتوقساننان 2024 جىلعى 15 قاڭتارعا دەيىن بىشكەكتىڭ ۋاقىتشا ۇستاۋ يزولياتورىنا قاماۋعا الۋ تۇرىندەگى بۇلتارتپاۋ شاراسىن تاڭداعان. ءبىراق 2023 جىلعى 28 جەلتوقساندا پسيحياتردىڭ ۇسىنىسى بويىنشا ايىپتالۋشى №31 كولونياعا "ناقتىلانباعان پسيحياتريالىق بۇزىلىس، گالليۋسيناسيا" دياگنوزىمەن اۋىستىرىلعان.
"29 جەلتوقساندا №31 كولونياعا كەلگەننەن كەيىن ارستانبەك ابدىلدايەۆ دارىگەرلەرگە مەزگىل-مەزگىل جۇرەك ۋرۋى، باس اۋرۋى، قۇلاقتىڭ شۋىلى، اسقازاننىڭ اۋرۋى (تاماق ىشكەننەن كەيىن) سەكىلدى شاعىمدارىمەن جۇگىندى. تەكسەرىس قورىتىندىسى بويىنشا الدىن الا دياگنوز جاسالدى: ناقتىلانباعان پسيحوتيكالىق بۇزىلىس، جۇرەك اۋرۋى، وتە ءقاۋىپتى گيپەرتونيا. دياگنوزدى ناقتىلاۋ ءۇشىن كارديولوگ، گاستروەنتەرولوگ جانە پسيحياتر دارىگەرلەر كوميسسيالىق تەكسەرىس جۇرگىزۋ قاجەت ەكەنى تۋرالى شەشىم قابىلداندى. 5 قاڭتاردا ساعات 4.52 شاماسىندا ارستانبەك ابدىلدايەۆ كولونيانىڭ اسحانا بولىمشەسىنە كىرىپ، 5.15-تە اسىلعان كۇيىندە تابىلدى"، - دەلىنگەن حابارلامادا.
سونىمەن قاتار، ۆەدومستۆو مالىمەتىنشە، ءمايىتتى تەكسەرگەن كەزدە دەنە جاراقاتى تابىلماعان. ءولىمنىڭ ناقتى سەبەبىن انىقتاۋ ءۇشىن كوميسسيالىق سوت-مەديسينالىق ساراپتاما تاعايىندالعان.
ارستان الاي بىلتىر جەلتوقساندا ۇستالدى. ونىڭ ۇستىنەن قىرعىزستان قىلمىستىق كودەكسىنىڭ 330-بابى "ءدىني ارازدىقتى قوزدىرۋ (الاۋىزدىق)" بويىنشا قىلمىستىق ءىس قوزعالدى.
قاماۋعا الۋعا جانە قىلمىستىق ءىس قوزعاۋعا الايدىڭ الەۋمەتتىك جەلىلەردە، كىتاپتارىندا "ءدىني جانە ءدىنارالىق ارازدىقتى قوزدىرۋعا ۇندەۋ جاريالاعانى، ءدىندارلىعى نەگىزىندە ازاماتتاردىڭ جەكە باسىن ناسيحاتتايتىنى" تۋرالى اقپارات نەگىز بولعان. كەيىن ونىڭ قاماۋدا قالعانى ايتىلدى.
ارستان الاي 2011 جىلدىڭ اياعىندا "قىس بولمايدى" دەپ ايتقان كەزدە تانىمال بولدى.
"كۇلەسىڭدەر، ءبىراق كەيىن ءبارى راستالادى. قىس بولمايدى، باتىستا سۋ تاسقىنى بولادى. كورەسىڭدەر، سوسىن كۇلەسىڭدەر"، - دەگەن ەدى ول باسپا ءسوز ءماسليحاتىندا.
