استانادان سۋ تاسقىنىنان زارداپ شەككەن وڭىرلەرگە 1 مىڭ تونناعا جۋىق گۋمانيتارلىق كومەك جىبەرىلدى،- دەپ حابارلايدى Dalanews.kz.
بۇگىن ەلوردالىق سپورتشىلاردىڭ، دەنە شىنىقتىرۋ جانە سپورت باسقارماسىنىڭ، ۆەدومستۆولىق باعىنىستى ۇيىمداردىڭ قىزمەتكەرلەرىنىڭ كۇشىمەن تاعى 8 توننا گۋمانيتارلىق كومەك جينالىپ، قوستاناي وبلىسىنا جىبەرىلدى.
دەنە شىنىقتىرۋ جانە سپورت باسقارماسىنىڭ باسشىسى ۆاسيليي ليەۆيت ارىپتەستەرىنە قازىرگى قيىن جاعدايدا كومەك كورسەتكەنى ءۇشىن العىسىن ءبىلدىردى.
«ەلىمىزدىڭ بىرنەشە وڭىرىندە سۋ تاسقىنى بولىپ جاتىر، قازاقستاندىق ەرىكتىلەر قيىن ساتتە ەشقاشان شەتتە قالمادى. ءبىزدىڭ كوپتەگەن وتانداستارىمىز سۋ تاسقىنىنان زارداپ شەككەندەرگە كومەكتەسەدى. استانا سپورتشىلارى ءارقاشان كومەك قولىن سوزادى. بۇگىن ەلوردانىڭ دەنە شىنىقتىرۋ جانە سپورت باسقارماسى قىزمەتكەرلەرى مەن ۆەدومستۆولىق باعىنىستى مەكەمەلەر قىزمەتكەرلەرىنىڭ قاتىسۋىمەن قوستاناي وبلىسىنا گۋمانيتارلىق كومەك جىبەرىلىپ جاتىر»، – دەدى ۆاسيليي ليەۆيت.
سونداي-اق، ەلوردالىق سپورتشىلار يليا يلين، ۆاسيليي تاحتاي، سەرگەي سىرۋلنيكوۆ، ابزال اجگالييەۆ، مەرەي اقشالوۆ، ايتىم جاقىپوۆ جانە كاراتە فەدەراسياسىنىڭ، گيمناستيكا فەدەراسياسىنىڭ وكىلدەرى سۋ تاسقىنىنان زارداپ شەككەندەرگە گۋمانيتارلىق كومەك كورسەتۋدە.
گۋمانيتارلىق كومەك جيناۋ ءالى دە جالعاسىپ جاتىر. بۇعان دەيىن «AMANAT» پارتياسىنىڭ استانا قالالىق فيليالىنىڭ كۇشىمەن «جاستار رۋحى» جاستار قاناتىمەن، «استانا جاستارى» جرو ەرىكتىلەرىمەن بىرلەسىپ، قالا اكىمدىگىنىڭ، قالالىق ءماسليحات دەپۋتاتتارىنىڭ، قوعام قايراتكەرلەرىنىڭ، ۇكىمەتتىك ەمەس ۇيىمداردىڭ، شاعىن، ورتا جانە ءىرى بيزنەس يەلەرىنىڭ قولداۋىمەن گۋمانيتارلىق كومەك جينالىپ، وڭىرلەرگە جولداندى.
سونىمەن قاتار، ەلوردالىق قازاقستان حالقى اسسامبلەياسى دوستىق ءۇيىنىڭ بازاسىندا سۋ تاسقىنىنان زارداپ شەككەن وڭىرلەردىڭ تۇرعىندارى ءۇشىن گۋمانيتارلىق كومەك جيناۋ بويىنشا الەۋمەتتىك اكسيا ۇيىمداستىردى. كومەك اقمولا جانە قاراعاندى وبلىستارىنىڭ تۇرعىندارىنا جەتكىزىلدى. زارداپ شەككەندەرگە كيىم، تاماق، گيگيەنا قۇرالدارى، توسەك-ورىن، ىدىس-اياق جانە دارى-دارمەكتەر جينالدى.
ەستەرىڭىزگە سالا كەتەيىك، ەلوردادا گۋمانيتارلىق كومەكتى قابىلدايتىن 9 پۋنكت جۇمىس ىستەيدى، جيىنعا 30-عا جۋىق ەرىكتىلەر ۇيىمى قاتىسادى.
كۇن سايىن 200-دەن استام ەرىكتى قاجەتتى زاتتاردى سۇرىپتاپ جىبەرەدى. جينالعان كومەكتىڭ ىشىندە كيىم، ازىق-تۇلىك، گيگيەنا قۇرالدارى مەن اياق كيىم باستى ورىن الادى.
ەرىكتىلەر قارجىلىق كومەكتى قابىلدامايدى. نيەت بىلدىرۋشىلەر جيناۋ ورىندارىنا قاجەتتى زاتتاردى جيناپ، اكەلە الادى.
