استانادا وتباسىلىق قايعىلى جاعدايدى سىلتاۋراتىپ جاسالعان الاياقتىق اشكەرە بولدى، دەپ حابارلايدى Dalanews.kz.
سوتتالعان ايەل دەكرەتتىك دەمالىستا بولا وتىرىپ، ءبىر جىل بويى ءوزىنىڭ ارىپتەستەرىن جۇيەلى تۇردە جاڭىلىستىرىپ، وتباسىندا قايعىلى وقيعالار بولدى دەگەن سىلتاۋمەن، ونىڭ ىشىندە اناسىنىڭ قايتىس بولۋى جانە بالاسىنىڭ اۋىر حالدە ەكەندىگى جونىندە كورىنەۋ جالعان مالىمەتتەر حابارلاپ، سول ارقىلى ولاردىڭ جاناشىرلىق سەزىمىن تۋدىرعان.
ونىڭ سوزدەرىنە سەنگەن جانە كومەك كورسەتكىسى كەلگەن ارىپتەستەرى، وتباسىلىق ماسەلەلەردى شەشۋگە جانە بالانى ەمدەۋگە قاجەت دەپ ويلاپ، سوتتالعان ايەلگە اقشا قاراجاتىن اۋدارىپ وتىرعان.
قىلمىستىق ارەكەتتەردىڭ سالدارىنان جابىرلەنۋشىلەرگە 2 ملن تەڭگەدەن استام سوماعا شىعىن كەلتىرىلگەن.
جەڭىلدەتەتىن ءمان-جايلاردى، اتاپ ايتقاندا كىناسىن مويىنداۋىن، شىن جۇرەكتەن وكىنۋىن، كەلتىرىلگەن زالالدى ءىشىنارا وتەۋىن ەسكەرە وتىرىپ، سوت ۇكىمىمەن وعان 3 جىل مەرزىمگە پروباسيالىق باقىلاۋ بەلگىلەنە وتىرىپ، باس بوستاندىعىن شەكتەۋ جازاسى تاعايىندالدى. ۇكىم زاڭدى كۇشىنە ەندى.
