استاناداعى «Big شانحاي» ساۋدا كەشەنىندە بولعان الاپات ءورت سالدارىنان جۇزدەگەن كاسىپكەر كاسىبىنەن ايىرىلدى. ءقازىر زارداپ شەككەندەر ءوز شىعىندارىن ەسەپتەپ جاتىر. ساۋدا ورنى تولىعىمەن جانىپ كەتكەن. جالپى ءورت 30 مىڭ شارشى مەتر اۋماقتى شارپىعان،- دەپ حابارلايدى Dalanews.kz كتك ارناسىنا سىلتەمە جاساپ.
ءورت كەزىندە ءۇش قۇتقارۋشى جاراقات العان. ولار بۇگىن اۋرۋحانادان شىعارىلىپ، امبۋلاتورلىق ەمدەۋگە جىبەرىلدى. ال بازارداعى كاسىپكەرلەر ءورتتىڭ نەدەن شىققانىن جانە نەلىكتەن دەر كەزىندە ءورت سوندىرۋشىلەر شاقىرىلماعانىن تۇسىنە الماي وتىر. ولاردىڭ ايتۋىنشا، ءورت تۋرالى دابىلدى ەشكىم بەرمەگەن، ال ءورت سوندىرۋشىلەر وزدەرى كەلگەن.
ساۋداگەر اسقار ارىستانوۆتىڭ ايتۋىنشا، ول ساتاتىن سومكەلەر مەن ورامالداردىڭ ءبارى جانىپ كەتكەن. كاسىپكەر شىعىنىن 50 ميلليون تەڭگەگە باعالاپ وتىر. باسقا كاسىپكەرلەر دە وسىنداي قيىن جاعدايدا قالعان. ءبىرى 20 ميلليون تەڭگەلىك نەسيەسىن تولەي الماي جاتسا، ەندى ءبىرى سالىقتان بوساتىلماعانىن ايتىپ، شاعىمدانۋدا.
قازىرگى تاڭدا ءورتتىڭ ناقتى سەبەبى انىقتالعان جوق. ساۋدا ورنىنىڭ ماڭايى قورشالعان، پوليسيا كۇزەتۋدە، تەرگەۋ امالدارى ءجۇرىپ جاتىر. ساۋدا كەشەنىنىڭ اكىمشىلىگى دە، قالالىق بيلىك تە وقيعاعا قاتىستى تۇسىنىكتەمە بەرۋدەن باس تارتقان. ال زارداپ شەككەن كاسىپكەرلەر سانى 280-گە جۋىق دەيدى، دەگەنمەن ناقتى سانى ودان دا كوپ بولۋى مۇمكىن. سەبەبى، بازارداعى ساۋدا ورىندارىنىڭ سانى 1 مىڭنان 3 مىڭعا دەيىن جەتەدى دەگەن مالىمەت بار.
دەپۋتاتتار ەلدە تۇتاس بازارلار ءىس جۇزىندە ورتەنىپ جاتقان كەلەڭسىز جاعدايلارعا نازار اۋداردى.
“توتەنشە جاعدايلار دەپارتامەنتى 15 كۇندە ءورت بولعانى تۋرالى ارنايى انىقتاما بەرەدى جانە بۇل بانكتەرگە قارىزىن كەيىنگە قالدىرۋعا نەگىز بولادى. دەگەنمەن قارىزدىڭ ۇستىنە ءوسىمپۇل جۇرەدى. ال ءبىز تاراپ رەتىندە قوسىمشا سانكسيالار بولماي، بيزنەسكە اۋىرتپالىق تۇسىرىلمەگەنىن، كاسىپكەرلەر ءوز قىزمەتىن ەركىن جۇرگىزسە ەكەن دەيمىز”، – دەدى دەپۋتات ايتۋار قوشمامبەتوۆ.
ەسكە سالايىق، «Big شانحاي» بازارىنداعى ءورت 18 شىلدەدە تاڭعا جۋىق تۇتانعان. ونى سوندىرۋگە جوعارى دارەجەلى شاقىرتۋ بويىنشا قۇتقارۋشىلار جۇمىلدىرىلىپ، ءورت ءبىر تاۋلىكتەن استام ۋاقىت بويى سوندىرىلگەن. ساۋداگەرلەرگە قازىرگى تاڭدا كونتەينەرلەر بەرىلەتىنى ايتىلعانىمەن، ولاردىڭ ىشىندە ساۋدا جۇرگىزۋگە تاۋار قالماعان.
