استانادا كوشە قىلمىستارى ءجيى تىركەلەتىن اۋماقتاردى الدىن الا انىقتاپ، سول جەرلەردە پروفيلاكتيكالىق جۇمىستى كۇشەيتۋگە مۇمكىندىك بەرەتىن «كوشەدەگى قىلمىستى بولجاۋدىڭ جي-مودەلى» پيلوتتىق جوباسى ىسكە قوسىلدى. بۇل تۋرالى پروكۋراتۋرا مالىمدەدى،- دەپ حابارلايدى Dalanews.kz
مەملەكەت باسشىسىنىڭ بيىل 23 ماۋسىمدا وتكەن قۇقىق قورعاۋ ورگاندارى القاسىنىڭ كەڭەيتىلگەن وتىرىسىندا ايتقان تاپسىرماسىن ورىنداۋ ماقساتىندا – قىلمىستىق قاتەرلەردى بولجاۋ جانە ولارعا قارسى ءىس-قيمىل جۇيەسىن قايتا ىسكە قوسۋ ءۇشىن قۇقىقتىق ستاتيستيكا جانە ارنايى ەسەپكە الۋ كوميتەتىنىڭ الەۋەتىن پايدالانا وتىرىپ، قوعامدىق قاۋىپسىزدىك سالاسىنداعى قاتەرلەردى الدىن الا انىقتاپ، ەسكەرتۋگە باعىتتالعان بولجامدى-تالدامالىق ورتالىققا ۆەدومستۆونى ترانسفورماسيالاۋ جونىندەگى كەشەندى شارالار ازىرلەندى.
جوبانىڭ باستى ماقساتى – قىلمىستىق قاتەرلەردى الدىن الا بولجايتىن جانە ەسكەرتۋگە مۇمكىندىك بەرەتىن زاماناۋي جۇيە قالىپتاستىرۋ.
وسى ماقساتتا باس پروكۋروردىڭ تاپسىرماسىمەن ۆەدومستۆو جانىنان قوعامدىق قاۋىپسىزدىك قاتەرلەرى مەن قىلمىستىق قاۋىپتەردى بولجاۋ ورتالىعى پيلوتتىق رەجيمدە قۇرىلدى.
اتالعان ورتالىقتىڭ العاشقى قادامدارىنىڭ ءبىرى – 9 شىلدەدە استانادا «كوشەدەگى قىلمىستى بولجاۋدىڭ جي-مودەلى» پيلوتتىق جوباسىنىڭ ىسكە قوسىلۋى.
جوبا ىشكى ىستەر مينيسترلىگىمەن بىرلەسىپ جۇزەگە اسىرىلىپ جاتىر جانە ونىڭ ماقساتى – كوشە قىلمىستارى ءجيى بولاتىن ورىنداردى الدىن الا انىقتاپ، سول اۋماقتاردا ۋاكىلەتتى ورگاندار، سونىڭ ىشىندە پوليسيا تاراپىنان پروفيلاكتيكالىق شارالاردى كۇشەيتۋ.
جۇيە جاڭا تەحنولوگيالار مەن ۇلكەن دەرەكتەر بازاسىنا نەگىزدەلگەن. ول قىلمىستار تۋرالى اقپاراتتى قاشان جانە قايدا قۇقىقبۇزۋشىلىق بولعانىن تالدايدى.
سوڭعى 10 جىلدا ەلوردادا تىركەلگەن قىلمىستىق وقيعالار بويىنشا جيناقتالعان تاريحي مالىمەتتەر نەگىزىندە جاساندى ينتەللەكت ەلەمەنتتەرىنىڭ كومەگىمەن بەلگىلى ءبىر راديۋستا بەلگىلى ءبىر قىلمىستىڭ بولۋ ىقتيمالدىعى بولجانادى. بۇل پروبلەمالىق اۋدانداردى انىقتاپ، الدىن الۋ شارالارىن قابىلداۋعا مۇمكىندىك بەرەدى.
اتالعان مالىمەتتەردىڭ ارقاسىندا پوليسيا پاترۋلدەۋ باعىتتارىن ءتيىمدى جوسپارلاپ، ىقتيمال قۇقىقبۇزۋشىلىقتارعا جەدەل ارەكەت ەتە الادى، ال جەرگىلىكتى اتقارۋشى ورگاندار – قالالىق ينفراقۇرىلىمدى ءقاۋىپسىز ەتۋ بويىنشا (بەينەباقىلاۋ كامەرالارىن ورناتۋ، جارىقتاندىرۋ جانە ت.ب.) شارالار قابىلداي الادى.
جوبا اياسىندا پيلوتتىق كەزەڭ ءساتتى جۇزەگە اسىرىلسا، بۇل تاجىريبە ەلىمىزدىڭ باسقا دا ءىرى قالالىق اگلومەراسيالارىنا ەنگىزىلەدى.
