ەلوردادا جول قوزعالىسى ەرەجەسىن ورەسكەل بۇزعان جۇرگىزۋشىلەر انىقتالدى. سالىق زيمانوۆ كوشەسىندە Skoda مەن ەكى Toyota Highlander كولىگىنىڭ يەلەرى جولدى تولىق جاۋىپ، ءقاۋىپتى جىلدامدىقپەن جارىس ۇيىمداستىرعان. سالدارىنان وزگە كولىك قاتىسۋشىلارى ءۇشىن اپاتتى جاعدايلار تۋىنداعان، دەپ حابارلايدى Dalanews.kz.
پوليسيانىڭ مالىمەتىنە سۇيەنسەك، وقيعاعا 18 جانە 33 جاستاعى ەر ادامدار جانە جۇرگىزۋشى كۋالىگى جوق كامەلەتكە تولماعان ءجاسوسپىرىم قاتىسقان.
بارلىق كولىك ايىپتۇراققا جەتكىزىلدى. ال ءجاسوسپىرىمنىڭ اتا-اناسى بىرنەشە قۇقىق بۇزۋشىلىق بويىنشا جاۋاپقا تارتىلدى. ولارعا كولىكتى قۇقىعى جوق ادامعا بەرۋ، بالا تاربيەسىنە نەمقۇرايلى قاراۋ جانە تۇنگى ۋاقىتتا بالانىڭ قاراۋسىز جۇرۋىنە جول بەرۋ دەرەكتەرى بويىنشا اكىمشىلىك شارالار قولدانىلدى.
