استانادا ق ر پارلامەنتى ءماجىلىسىنىڭ دەپۋتاتى، قازاقستان رەسپۋبليكاسى پرەزيدەنتىنىڭ جانىنداعى حالىقتىڭ الەۋمەتتىك وسال توپتاردىڭ قۇقىقتارى جونىندەگى ۋاكىل كەنجەعۇل سەيتجاننىڭ توراعالىعىمەن، ق ر كم ازاماتتىق اۆياسيا كوميتەتىنىڭ ءتوراعاسى سالتانات تومپييەۆامەن بىرلەسىپ مۇمكىندىگى شەكتەۋلى جاندارعا اۋە كولىگىندە قىزمەت كورسەتۋ ماسەلەلەرى بويىنشا وتىرىس ءوتتى،- دەپ حابارلايدى Dalanews.kz
وعان قازاقستاننىڭ اۆياسيالىق اكىمشىلىگى، حالىقارالىق ازاماتتىق اۆياسيا قاۋىمداستىعى (IATA)، سونداي-اق قازاقستاندىق جانە شەتەلدىك اۋە كومپانيالارىنىڭ وكىلدەرى قاتىستى.
كەنجەعۇل سەيتجان اۋە كولىگىن پايدالانۋ كەزىندە مۇمكىندىگى شەكتەۋلى جاندار بەپتە-بەت كەلەتىن قيىندىقتارعا توقتالدى. ءوز كەزەگىندە سالتانات تومپييەۆا اۋە كولىگىمەن تاسىمالداۋ بارىسىندا مۇمكىندىگى شەكتەۋلى جولاۋشىلارعا جاعداي جاساۋ باعىتىندا جۇرگىزىلىپ جاتقان جۇمىستار تۋرالى باياندادى. قازىرگى تاڭدا مۇگەدەكتىگى بار تۇلعالارعا اۋە بيلەتتەرىن ساتىپ الۋعا جەڭىلدىكتەر بەرۋ ماسەلەلەرى جونىندە قولدانىستاعى زاڭناماعا تۇزەتۋلەر ەنگىزۋ قاراستىرىلىپ جاتىر.
قازاقستاننىڭ اۆياسيالىق اكىمشىلىگىنىڭ وكىلدەرى ازاماتتىق اۆياسيا سۋبەكتىلەرىنىڭ زاڭنامالىق تالاپتارعا سايكەستىگى، ونىڭ ىشىندە مۇمكىندىگى شەكتەۋلى جاندار ءۇشىن جاسالعان جاعدايلار بويىنشا تۇراقتى نەگىزدە تەكسەرۋلەر جۇرگىزىلەتىنىن اتاپ ءوتتى. زاڭ بۇزۋشىلىقتار ورىن العان جاعدايدا ءتيىستى شارالار قابىلدانادى.
IATA-نىڭ ورتالىق ازيا بويىنشا وڭىرلىك مەنەدجەرى ريزۆان سيدديكي مۇمكىندىگى شەكتەۋلى جولاۋشىلارعا قولايلى جاعداي جاساۋ اسسوسياسيانىڭ باسىم باعىتتارىنىڭ ءبىرى ەكەنىن اتاپ ءوتتى. IATA تۇراقتى تۇردە ۇيىم مۇشەلەرىمەن (دۇنيەجۇزى بويىنشا 360-تان استام اۋە كومپانياسى) كەڭەستەر وتكىزىپ، اۋە كومپانيالارىنا جۇزەگە اسىرۋ ءۇشىن جىبەرىلەتىن ستاندارتتاردى ازىرلەيدى.
اۋە كومپانيالارى دا مۇمكىندىگى شەكتەۋلى جاندارعا جاعداي جاساۋ بويىنشا ءوز جۇمىستارى جونىندە ەسەپ بەردى. كەڭەس قورىتىندىسى بويىنشا ازاماتتىق اۆياسيا كوميتەتىنىڭ ءتوراعاسى كوتەرىلگەن بارلىق ماسەلەلەر اۋە كومپانيالارىمەن بىرلەسىپ قاراستىرىلاتىنىن اتاپ ءوتتى.
