استانادا ليفتتە بالانى پىشاقتاعان ءجاسوسپىرىمنىڭ اناسىنا 78 640 تەڭگە كولەمىندە ايىپپۇل سالىندى، دەپ حابارلايدى Dalanews.kz Stan.kz-كە سىلتەمە جاساپ. 

ايەل اكىمشىلىك قۇقىق بۇزۋشىلىق تۋرالى كودەكسىنىڭ 127-بابىنا (كامەلەتكە تولماعان ادامدى تاربيەلەۋ جانە وعان ءبىلىم بەرۋ، ونىڭ قۇقىقتارىن نەمەسە مۇددەلەرىن قورعاۋ جونىندەگى مىندەتتەردى، قاۋىپسىزدىگىن قامتاماسىز ەتۋ جونىندەگى شارالاردى ورىنداماۋ) سايكەس جاۋاپقا تارتىلدى.

بۇل باپ بويىنشا ايىپپۇلدىڭ ەڭ جوعارى مولشەرى 20 ايلىق ەسەپتىك كورسەتكىش (اەك) 78 640 تەڭگە. ءجاسوسپىرىم ءالى دە تەرگەۋدە، تەرگەۋ جالعاسىپ جاتىر. 

ايتا كەتەيىك، جەلىدە استاناداعى تۇرعىن ءۇي كەشەندەرىنىڭ ءبىرىنىڭ ليفتىندە باقىلاۋ كامەراسىنان ۆيدەو پايدا بولدى.

وندا بەس جاسار بالانىڭ بەتىن كەسكەن ءجاسوسپىرىم ءتۇسىپ قالعان. كادرلاردا ءجاسوسپىرىم ليفت جابىلۋىنا جول بەرمەي، قىزدىڭ كەتۋىنە كەدەرگى كەلتىرگەنى كورىنەدى.

ول پىشاقتى شىعارىپ، بالاعا كەزەمەك بولادى. ءبىراق ول بىردەڭەدەن سەسكەنىپ، پىشاقتى تىقپايدى.