استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ ۇيىتقى بولۋىمەن جانە ەسىل اۋدانى اكىمدىگىنىڭ قولداۋىمەن نۇرجول بۋلۆارىندا، ياعني «كەرۋەن» ساۋدا ورتالىعى ماڭىنداعى اشىق الاڭقايدا اباي كۇنىنە ارنالعان «دومبىرا party» كەشى ءوتتى،- دەپ حابارلايدى Dalanews.kz
اشىق اسپان استىندا ۇيىمداستىرىلعان شارادا قازاقتىڭ قارا دومبىراسىمەن ابايدىڭ اندەرى شىرقالىپ، كۇمبىرلەگەن كۇيلەر توگىلدى. قالا تۇرعىندارى مەن قوناقتارى ەركىن فورماتتا وتكەن كەشكە بەلسەنە قاتىسىپ، ۇلتتىق اسپاپتىڭ ۇنىنە قۇلاق ءتۇرىپ، وزدەرى دە ءان شىرقاپ، كۇي شەرتۋگە مۇمكىندىك الدى.
«بيىل – ۇلى ابايدىڭ 180 جىلدىعى. بۇگىن كلاسسيك اقىنىمىزدىڭ تۋعان كۇنى. وسىعان وراي ەلىمىزدىڭ رۋحاني استاناسى — سەمەي قالاسىندا كەڭ اۋقىمدى مەرەيتويلىق ءىس-شارالار ءوتىپ، حالقىمىز اباي مۇراسىنا دەگەن قۇرمەتىن تاعى ءبىر مارتە تەرەڭ سەزىنىپ، تانىتتى.
ال ەلوردا تورىندە ۇيىمداستىرىلىپ وتىرعان بۇل كەش — سول سەمەيدەگى مەرەكەلىك دۋماننىڭ جالعاسى، ءارى استانالىقتاردىڭ دا ۇلت رۋحىنا، اباي مۇراسىنا ءۇن قوسۋىنىڭ ايعاعى.
«اباي – بار قازاقتىڭ ورتاق رۋحاني تەمىرقازىعى. سوندىقتان سەمەيدە وتكەن توي – تەك ءبىر ءوڭىردىڭ ەمەس، كۇللى حالىقتىڭ قۋانىشى. بۇگىنگى «دومبىرا party» كەشى ارقىلى ەلوردا جۇرتشىلىعى دا ءوز تاراپىنان اباي رۋحىنا تاعزىم ەتىپ، ونىڭ وسيەت سوزدەرىن، ان-كۇيلەرىن ەل بولىپ ەسكە الۋدا. بۇل – رۋحاني ساباقتاستىقتىڭ بەلگىسى»، – دەيدى ۇيىمداستىرۋشى الماس التاي.
سونداي-اق شارانىڭ باستى ماقساتى — قازاقتىڭ ءتول اسپابى دومبىرانى ۇلىقتاۋ، ۇلتتىق ونەردى كەڭىنەن ناسيحاتتاۋ. ەندى ءبىر جاعىنان بۇل — قالا ءومىرىنىڭ قاربالاسىنان ءبىر ساتكە بوي جازىپ، تۇرعىندارعا سەرۋەندەي ءجۇرىپ رۋحاني تىنىس الۋعا مۇمكىندىك بەرەتىن حالىقتىق مادەني دەمالىس فورماتى.
ايتا كەتۋ كەرەك، «دومبىرا party» جوباسى العاش رەت 2012 جىلى لوندون وليمپياداسى كەزىندە قازاق سپورتشىلارى جەڭىپ العان التىن مەدالداردىڭ قۋانىشىن جۇرت بولىپ تويلاۋ بارىسىندا باستاۋ العان. سودان بەرى بۇل باستاما جالپىۇلتتىق دەڭگەيدەگى رۋحاني-مادەني مەرەكەلەردىڭ بىرىنە اينالىپ، ۇلتتىق قۇندىلىقتاردى دارىپتەۋدىڭ تىڭ فورماتىنا اينالدى.
ۇيىمداستىرۋشىلاردىڭ ايتۋىنشا، مۇنداي شارالار الداعى ۋاقىتتا دا جالعاسىن تاۋىپ، ەلوردانىڭ رۋحاني ومىرىندە ماڭىزدى ورىن الماق.
