Astana qalasynyń Tilderdi damytý jáne arhiv isi basqarmasynyń uiytqy bolýymen jáne Esil aýdany ákimdiginiń qoldaýymen Nurjol býlvarynda, iaǵni «Kerýen» saýda ortalyǵy mańyndaǵy ashyq alańqaida Abai kúnine arnalǵan «Dombyra party» keshi ótti,- dep habarlaidy Dalanews.kz
Ashyq aspan astynda uiymdastyrylǵan sharada qazaqtyń qara dombyrasymen Abaidyń ánderi shyrqalyp, kúmbirlegen kúiler tógildi. Qala turǵyndary men qonaqtary erkin formatta ótken keshke belsene qatysyp, ulttyq aspaptyń únine qulaq túrip, ózderi de án shyrqap, kúi shertýge múmkindik aldy.
«Biyl – uly Abaidyń 180 jyldyǵy. Búgin klassik aqynymyzdyń týǵan kúni. Osyǵan orai elimizdiń rýhani astanasy — Semei qalasynda keń aýqymdy mereitoilyq is-sharalar ótip, halqymyz Abai murasyna degen qurmetin taǵy bir márte tereń sezinip, tanytty.
Al elorda tórinde uiymdastyrylyp otyrǵan bul kesh — sol Semeidegi merekelik dýmannyń jalǵasy, ári astanalyqtardyń da ult rýhyna, Abai murasyna ún qosýynyń aiǵaǵy.
«Abai – bar qazaqtyń ortaq rýhani temirqazyǵy. Sondyqtan Semeide ótken toi – tek bir óńirdiń emes, kúlli halyqtyń qýanyshy. Búgingi «Dombyra party» keshi arqyly elorda jurtshylyǵy da óz tarapynan Abai rýhyna taǵzym etip, onyń ósiet sózderin, án-kúilerin el bolyp eske alýda. Bul – rýhani sabaqtastyqtyń belgisi», – deidi uiymdastyrýshy Almas Altai.
Sondai-aq sharanyń basty maqsaty — qazaqtyń tól aspaby dombyrany ulyqtaý, ulttyq ónerdi keńinen nasihattaý. Endi bir jaǵynan bul — qala ómiriniń qarbalasynan bir sátke boi jazyp, turǵyndarǵa serýendei júrip rýhani tynys alýǵa múmkindik beretin halyqtyq mádeni demalys formaty.
Aita ketý kerek, «Dombyra party» jobasy alǵash ret 2012 jyly London Olimpiadasy kezinde qazaq sportshylary jeńip alǵan altyn medaldardyń qýanyshyn jurt bolyp toilaý barysynda bastaý alǵan. Sodan beri bul bastama jalpyulttyq deńgeidegi rýhani-mádeni merekelerdiń birine ainalyp, ulttyq qundylyqtardy dáripteýdiń tyń formatyna ainaldy.
Uiymdastyrýshylardyń aitýynsha, mundai sharalar aldaǵy ýaqytta da jalǵasyn taýyp, elordanyń rýhani ómirinde mańyzdy oryn almaq.
