استانا قالاسىنىڭ سارايشىق اۋدانىنداعى بەلسەندى ۇزاق ءومىر ءسۇرۋ ورتالىعى 1 ساۋىردەن باستاپ ءوز جۇمىسىن باستادى، دەپ حابارلايدى Dalanews.kz

ەلوردادا زەينەتكەرلەر ءۇشىن تەگىن ۇيىرمەلەر مەن سەكسيالار جۇمىس ىستەيدى. بۇل ورتالىقتا وڭالتۋ گيمناستيكاسى، ترەناجەرلىك زال، يوگا، سكانديناۆيالىق سەرۋەن، توعىزقۇمالاق، شاحمات، تەننيس، ەڭبەك تەراپياسى، الەۋمەتتىك جەلىلەر ۇيىرمەلەرى مەن پروفيلاكتيكالىق ماسساج بار.

ورتالىققا زەينەتكەرلەردى تىركەۋ 17 ناۋرىزدا باستالدى، قازىرگى ۋاقىتتا سارايشىق اۋدانى بويىنشا 60 ادام تىركەلدى. ورتالىققا كەلىپ تىركەلۋ ءۇشىن زەينەتكەردىڭ جەكە كۋالىگى، زەينەتكەر كىتاپشاسى، استانا قالاسىندا تۇرعىلىقتى جەرى بويىنشا تىركەۋى بولۋى قاجەت.

الداعى ۋاقىتتا سارايشىق اۋدانىندا الەۋمەتتىك-ساۋىقتىرۋ، الەۋمەتتىك-ەڭبەك، الەۋمەتتىك-اۋەسقوي باعىتىندا ۇيىرمەلەر اشۋ جوسپاردا بار.

ورتالىق فيليالدارى الماتى اۋدانى بويىنشا ر.قوشقاربايەۆ كوشەسى، 29/1 ۇيدە، بايقوڭىر اۋدانى بويىنشا اباي كوشەسى، 46 ۇيدە، ەسىل اۋدانى بويىنشا دوستىق كەشەسى، 13 ۇيدە، سارىارقا اۋدانى بويىنشا بەيبىتشىلىك كوشەسى، 25 ۇيدە، نۇرا اۋدانى بويىنشا تولە بي كوشەسى، 44 ۇيدە ورنالاسقان.

بۇگىندە 15 مىڭنان استام قالا زەينەتكەرى تەگىن ۇيىرمەلەر مەن سەكسيالارعا قاتىسۋدا.