استاناداعى جازۋشىلار اللەياسىندا قازاقتىڭ ۇلى اقىنىنىڭ 180 جىلدىعىنا ارنالعان «شىن حاكىم، ءسوزىڭ اسىل – باعا جەتپەس...» اتتى ادەبي كەش ءوتتى،- دەپ حابارلايدى Dalanews.kz
ءىس-شارانى جاس دومبىراشىلار «الاش اماناتى» كۇيىمەن اشتى، كەيىن كەش اقىننىڭ ولەڭدەرىن وقۋىمەن جالعاستى. شامامەن 40 بالا ابايدىڭ شىعارمالارى مەن ايگىلى قارا سوزدەرىن جاتقا وقىدى. ولاردىڭ اراسىندا ۇلى ويشىلدىڭ شىعارماشىلىعىنا قىزىعۋشىلىقپەن قاراعان مەكتەپ وقۋشىلارى بولدى.
«مەن اباي قۇنانباي ۇلىنىڭ ولەڭدەرىن 4-سىنىپتان باستاپ جاتتايمىن. ورتا بۋىنعا وتكەندە، بايقاۋلارعا قاتىسا باستادىم. العاش رەت ادەبي بايقاۋعا قاتىسىپ، 105 ولەڭى وقىپ بەردىم. ءقازىر 125 شىعارماسىن جاتقا بىلەمىن، ولاردىڭ اراسىندا «ەسكەندىر» جانە «ماسعۇت» پوەمالارى بار. ەڭ سۇيىكتى ولەڭىم – «ولسەم ورنىم قارا جەر، سىز بولماي ما؟».
ابايدىڭ تۋىندىلارىن جاتتاۋ ماعان قيىن بولعان جوق. جاسىم وسكەن سايىن اقىندى تەرەڭىرەك ءتۇسىنىپ كەلەمىن. ونىڭ ءار سوزىندە فيلوسوفيا جاتىر. ءقازىر اباي شىعارماشىلىعىنا دەگەن سۇيىسپەنشىلىكتى ءسىڭىلىمنىڭ بويىنا دارىتىپ ءجۇرمىن. ونىڭ مەنىڭ جولىمدى قۋعانىن، مەنەن ۇلگى العانىن قالايمىن. العاشقى جۇلدەمدى بەسىنشى سىنىپتا الدىم، سول كەزدە مەكتەپىشىلىك بايقاۋدا ابايدىڭ 30 ولەڭىن ايتقان ەدىم. ءقازىر ءتۇرلى شىعارماشىلىق بايقاۋلاردان جيناعان جۇلدەلەرىم 20-30-عا جۋىقتادى»، – دەيدى اباي قۇنانباي ۇلى اتىنداعى №87 مەكتەپ-گيمنازيانىڭ 8-سىنىپ وقۋشىسى شىنار باتىرحان قىزى.
بۇل كۇنى ۇيىمداستىرۋشىلار «بالا اباي» اتتى ساحنالىق قويىلىم قويدى. وندا ابايدىڭ اجەسى زەرەمەن بىرگە وتىرىپ اڭگىمە قۇرعان ءساتى بەينەلەندى. اكتەرلىك شەبەرلىكتى اباي بەينەسىن بالا – وقىرمان الينۇر اليشانوۆ پەن زەرە ءرولىن ورتالىقتاندىرىلعان كىتاپحانا جۇيەسىنىڭ قىزمەتكەرى ساعادات يمانبەكوۆا كورسەتتى. ولار دانا زەرە مەن زەرەك بالا ابايدىڭ بەينەسىن كورەرمەنگە جەتكىزۋگە تىرىستى.
«بۇگىن جازۋشىلار اللەياسىندا ابايدىڭ 180 جىلدىعىنا ارنالعان شارا ءوتىپ جاتىر. باستى ماقساتىمىز – ۇلى ويشىلدىڭ شىعارماشىلىعى ارقىلى ۇلتتىق، ادامگەرشىلىك، رۋحاني قۇندىلىقتاردى ناسيحاتتاۋ. ءبىز كىتاپ كورمەسىن ۇيىمداستىردىق، وندا ابايدىڭ بۇكىل ءومىر جولى كورىنىس تاپقان. قوناقتارعا 500-دەن استام كىتاپ قولجەتىمدى. سونىمەن قاتار، وسى ءىس-شارا اياسىندا اباي شىعارماشىلىعى تۋرالى بيبليوگرافيالىق كورسەتكىشتىڭ تانىستىرىلىمى وتەدى»، – دەيدى ورتالىقتاندىرىلعان كىتاپحانا جۇيەسىنىڭ جەتەكشىسى گۇلبادان مادىبايەۆا.
ءىس-شاراعا بايقوڭىر اۋدانى اكىمدىگىنىڭ قىزمەتكەرلەرى، قوعام قايراتكەرلەرى، جازۋشىلار مەن اقىندار قاتىستى.
قاتىسۋشىلار ۇلى اقىننىڭ سۇيىكتى ويىنى – توعىزقۇمالاقتى وينادى. سونىمەن قاتار، ۇيىمداستىرۋشىلار بالالارعا اباي قۇنانباي ۇلىنىڭ ولەڭدەرى مەن شىعارمالارى نەگىزىندە جاسالعان بوياۋ كىتاپشالارى بويىنشا شەبەرلىك ساباعىن وتكىزدى.
