Astanadaǵy Jazýshylar alleiasynda qazaqtyń uly aqynynyń 180 jyldyǵyna arnalǵan «Shyn hákim, sóziń asyl – baǵa jetpes...» atty ádebi kesh ótti,- dep habarlaidy Dalanews.kz
Is-sharany jas dombyrashylar «Alash amanaty» kúiimen ashty, keiin kesh aqynnyń óleńderin oqýymen jalǵasty. Shamamen 40 bala Abaidyń shyǵarmalary men áigili qara sózderin jatqa oqydy. Olardyń arasynda uly oishyldyń shyǵarmashylyǵyna qyzyǵýshylyqpen qaraǵan mektep oqýshylary boldy.
«Men Abai Qunanbaiulynyń óleńderin 4-synyptan bastap jattaimyn. Orta býynǵa ótkende, baiqaýlarǵa qatysa bastadym. Alǵash ret ádebi baiqaýǵa qatysyp, 105 óleńi oqyp berdim. Qazir 125 shyǵarmasyn jatqa bilemin, olardyń arasynda «Eskendir» jáne «Masǵut» poemalary bar. Eń súiikti óleńim – «Ólsem ornym qara jer, syz bolmai ma?».
Abaidyń týyndylaryn jattaý maǵan qiyn bolǵan joq. Jasym ósken saiyn aqyndy tereńirek túsinip kelemin. Onyń ár sózinde filosofiia jatyr. Qazir Abai shyǵarmashylyǵyna degen súiispenshilikti sińilimniń boiyna darytyp júrmin. Onyń meniń jolymdy qýǵanyn, menen úlgi alǵanyn qalaimyn. Alǵashqy júldemdi besinshi synypta aldym, sol kezde mektepishilik baiqaýda Abaidyń 30 óleńin aitqan edim. Qazir túrli shyǵarmashylyq baiqaýlardan jinaǵan júldelerim 20-30-ǵa jýyqtady», – deidi Abai Qunanbaiuly atyndaǵy №87 mektep-gimnaziianyń 8-synyp oqýshysy Shynar Batyrhanqyzy.
Bul kúni uiymdastyrýshylar «Bala Abai» atty sahnalyq qoiylym qoidy. Onda Abaidyń ájesi Zeremen birge otyryp áńgime qurǵan sáti beinelendi. Akterlik sheberlikti Abai beinesin bala – oqyrman Alinur Alishanov pen Zere rólin Ortalyqtandyrylǵan kitaphana júiesiniń qyzmetkeri Saǵadat Imanbekova kórsetti. Olar dana Zere men zerek bala Abaidyń beinesin kórermenge jetkizýge tyrysty.
«Búgin Jazýshylar alleiasynda Abaidyń 180 jyldyǵyna arnalǵan shara ótip jatyr. Basty maqsatymyz – uly oishyldyń shyǵarmashylyǵy arqyly ulttyq, adamgershilik, rýhani qundylyqtardy nasihattaý. Biz kitap kórmesin uiymdastyrdyq, onda Abaidyń búkil ómir joly kórinis tapqan. Qonaqtarǵa 500-den astam kitap qoljetimdi. Sonymen qatar, osy is-shara aiasynda Abai shyǵarmashylyǵy týraly bibliografiialyq kórsetkishtiń tanystyrylymy ótedi», – deidi Ortalyqtandyrylǵan kitaphana júiesiniń jetekshisi Gúlbadan Mádibaeva.
Is-sharaǵa Baiqońyr aýdany ákimdiginiń qyzmetkerleri, qoǵam qairatkerleri, jazýshylar men aqyndar qatysty.
Qatysýshylar uly aqynnyń súiikti oiyny – toǵyzqumalaqty oinady. Sonymen qatar, uiymdastyrýshylar balalarǵa Abai Qunanbaiulynyń óleńderi men shyǵarmalary negizinde jasalǵan boiaý kitapshalary boiynsha sheberlik sabaǵyn ótkizdi.
