اتالعان ءىس-شارادا جەتەكشى حالىقارالىق ساراپشىلار، ساياساتكەرلەر مەن سيفرلىق ەكونوميكانىڭ وكىلدەرى قازىرگى زاماننىڭ باستى سىن-تەگەۋرىندەرىنىڭ ءبىرى – زياتكەرلىك مەنشىكتى قورعاۋ مەن رەتتەۋ ماسەلەلەرىن تالقىلادى.
شارانى اشقان ادىلەت ءمينيسترى ەرلان سارسەمبايەۆ قازاقستان زياتكەرلىك مەنشىكتى ورنىقتى دامۋ، ينۆەستيسيالىق كليماتتى نىعايتۋ جانە سيفرلىق ترانسفورماسيا جاعدايىندا ءادىل ەرەجەلەردى قالىپتاستىرۋ ءۇشىن ستراتەگيالىق رەسۋرس رەتىندە قارايتىنىن اتاپ ءوتتى.
مينيستر جاساندى ينتەللەكتتىڭ قارقىندى دامۋى جاعدايىندا اۆتورلار، ازىرلەۋشىلەر جانە قوعام مۇددەلەرىنىڭ تەڭگەرىمىن قامتاماسىز ەتۋ ماسەلەسى ەرەكشە ماڭىزعا يە ەكەنىنە توقتالدى.
پانەلدىك سەسسيا بارىسىندا دۇنيەجۇزىلىك زياتكەرلىك مەنشىك ۇيىمىنىڭ باس ديرەكتورى دارەن تانگ ءسوز سويلەپ، قازاقستانعا العاشقى رەسمي ساپارىمەن كەلگەنىن اتاپ ءوتتى. ءوز بايانداماسىندا ول قازاقستاننىڭ زياتكەرلىك مەنشىك سالاسىندا تەڭگەرىمدى ءارى بولاشاققا باعىتتالعان ساياساتتى ىلگەرىلەتۋدە كوشباسشىلىق كورسەتىپ وتىرعانىن، سونداي-اق سيفرلىق ەكونوميكا مەن جاساندى ينتەللەكت جاعدايىنداعى يم جۇيەلەرىن ترانسفورماسيالاۋ جونىندەگى جاھاندىق پىكىرتالاستارعا بەلسەندى قاتىسىپ وتىرعانىنا ەرەكشە توقتالدى.
پىكىر الماسۋعا فرانسيا مەن سولتۇستىك ماكەدونيا مينيسترلەرى، مالايزيا مەن جۇڭگو دەلەگاسيالارى، سونداي-اق حالىقارالىق ۇيىمداردىڭ وكىلدەرى – ەۋرازيالىق پاتەنت ۆەدومستۆوسىنىڭ پرەزيدەنتى جانە ەۋرازيالىق ەكونوميكالىق كوميسسيانىڭ ەكونوميكا جانە قارجى ساياساتى جونىندەگى ءمينيسترى قاتىستى. ۇكىمەتتىك ەمەس سەكتور اتىنان Meta كومپانياسىنىڭ وكىلى ءسوز الىپ، الگوريتمدىك شىعارماشىلىق پەن گەنەراتيۆتى كونتەنتتىڭ جاڭا ۇلگىلەرى جاعدايىندا قۇقىقتاردى قورعاۋ تەتىكتەرىنىڭ ترانسفورماسياسىنا قاتىستى جاھاندىق سيفرلىق پلاتفورمانىڭ كوزقاراسىن ۇسىندى.
پانەلدىك سەسسيا زياتكەرلىك مەنشىكتىڭ بولاشاعىنا قاتىستى ستراتەگيالىق كوزقاراستارمەن الماسۋعا ارنالعان مازمۇندى ءارى سىندارلى پىكىرتالاس الاڭىنا اينالدى. وندا اۆتورلىق ۇعىمداردى قايتا پايىمداۋ قاجەتتىلىگىنەن باستاپ، قۇقىقتاردى قورعاۋدى جانە يننوۆاسيالاردى ىنتالاندىرۋدى قامتاماسىز ەتەتىن يكەمدى رەتتەۋ شەشىمدەرىن ازىرلەۋدىڭ ماڭىزدىلىعى اتاپ ءوتىلدى.
قازاقستان سيفرلىق داۋىردەگى زياتكەرلىك مەنشىككە قاتىستى ءادىل ءارى ءتيىمدى تاسىلدەردى قالىپتاستىرۋعا باعىتتالعان اشىق ديالوگ باستاماشىسى رەتىندە حالىقارالىق ىنتىماقتاستىققا بەلسەندىلىگىن تاعى ءبىر مارتە كورسەتتى.
