Atalǵan is-sharada jetekshi halyqaralyq sarapshylar, saıasatkerler men sıfrlyq ekonomıkanyń ókilderi qazirgi zamannyń basty syn-tegeýrinderiniń biri – zıatkerlik menshikti qorǵaý men retteý máselelerin talqylady.
Sharany ashqan Ádilet mınıstri Erlan Sarsembaev Qazaqstan zıatkerlik menshikti ornyqty damý, ınvestısıalyq klımatty nyǵaıtý jáne sıfrlyq transformasıa jaǵdaıynda ádil erejelerdi qalyptastyrý úshin strategıalyq resýrs retinde qaraıtynyn atap ótti.
Mınıstr jasandy ıntellekttiń qarqyndy damýy jaǵdaıynda avtorlar, ázirleýshiler jáne qoǵam múddeleriniń teńgerimin qamtamasyz etý máselesi erekshe mańyzǵa ıe ekenine toqtaldy.
Paneldik sesıa barysynda Dúnıejúzilik zıatkerlik menshik uıymynyń Bas dırektory Daren Tang sóz sóılep, Qazaqstanǵa alǵashqy resmı saparymen kelgenin atap ótti. Óz baıandamasynda ol Qazaqstannyń zıatkerlik menshik salasynda teńgerimdi ári bolashaqqa baǵyttalǵan saıasatty ilgeriletýde kóshbasshylyq kórsetip otyrǵanyn, sondaı-aq sıfrlyq ekonomıka men jasandy ıntellekt jaǵdaıyndaǵy IM júıelerin transformasıalaý jónindegi jahandyq pikirtalastarǵa belsendi qatysyp otyrǵanyna erekshe toqtaldy.
Pikir almasýǵa Fransıa men Soltústik Makedonıa mınıstrleri, Malaızıa men Qytaı delegasıalary, sondaı-aq halyqaralyq uıymdardyń ókilderi – Eýrazıalyq patent vedomstvosynyń Prezıdenti jáne Eýrazıalyq ekonomıkalyq komısıanyń Ekonomıka jáne qarjy saıasaty jónindegi mınıstri qatysty. Úkimettik emes sektor atynan Meta kompanıasynyń ókili sóz alyp, algorıtmdik shyǵarmashylyq pen generatıvti kontenttiń jańa úlgileri jaǵdaıynda quqyqtardy qorǵaý tetikteriniń transformasıasyna qatysty jahandyq sıfrlyq platformanyń kózqarasyn usyndy.
Paneldik sesıa zıatkerlik menshiktiń bolashaǵyna qatysty strategıalyq kózqarastarmen almasýǵa arnalǵan mazmundy ári syndarly pikirtalas alańyna aınaldy. Onda avtorlyq uǵymdardy qaıta paıymdaý qajettiliginen bastap, quqyqtardy qorǵaýdy jáne ınovasıalardy yntalandyrýdy qamtamasyz etetin ıkemdi retteý sheshimderin ázirleýdiń mańyzdylyǵy atap ótildi.
Qazaqstan sıfrlyq dáýirdegi zıatkerlik menshikke qatysty ádil ári tıimdi tásilderdi qalyptastyrýǵa baǵyttalǵan ashyq dıalog bastamashysy retinde halyqaralyq yntymaqtastyqqa belsendiligin taǵy bir márte kórsetti.
