ءباا كومپانياسىمەن كەلىسىمشارت بۇزىلعاننان كەيىن استانا اۋەجايىنا جاڭا ينۆەستور ءالى تابىلعان جوق. بۇل تۋرالى ەلوردالىق كولىك جانە جول-كولىك ينفراقۇرىلىمىن دامىتۋ باسقارماسى مالىمدەدى، دەپ حابارلايدى Dalanews.kz اگەنتتىگى Informburo.kz-كە سىلتەمە جاساپ.
قازىرگى تاڭدا اۋەجايدىڭ قىزمەتىن ءوز اكىمشىلىگى باسقارىپ وتىر.
2025 جىلعى 31 قازاندا استانا قالاسى اكىمدىگى مەن Terminals Astana Airport Limited كومپانياسى ءوزارا كەلىسىم بويىنشا سەنىمگەرلىك باسقارۋ تۋرالى شارتتى بۇزعان. اتالعان كەلىسىم "نۇرسۇلتان نازاربايەۆ حالىقارالىق اۋەجايى" اق-نىڭ 100% اكسياسىن سەنىمگەرلىك باسقارۋعا بەرۋدى كوزدەگەن ەدى.
"قازىرگى ۋاقىتتا اۋەجاي قىزمەتىن اكسيونەرلىك قوعام ءوزى باسقارىپ وتىر. رەيستەرگە قىزمەت كورسەتۋ، تەرمينالداردىڭ جۇمىسى، اۆياسيالىق قاۋىپسىزدىك پەن جولاۋشىلارعا كورسەتىلەتىن قىزمەتتەر بۇرىنعىداي، وزگەرىسسىز جالعاسۋدا"، – دەلىنگەن حابارلامادا.
باسقارمادا جاڭا ينۆەستور نەمەسە وپەراتور تارتۋ مۇمكىندىگى قاراستىرىلىپ جاتقانىن اتاپ ءوتتى. كونسالتينگتىك كومپانيالارمەن بىرلەسىپ، الەۋەتتى باسقارۋشىعا قويىلاتىن تالاپتار ازىرلەنۋدە. بۇل تالاپتار جولاۋشىلار جانە جۇك ينفراقۇرىلىمىن دامىتۋعا باعىتتالعان ينۆەستيسيالىق مىندەتتەمەلەردى قامتۋى مۇمكىن.
