عالىمنىڭ ءال-فارابي كىتاپحاناسىندا وتكەن العاشقى كوشباسشىلىق ءدارىسى «ەجەلگى داۋىردەگى دەموگرافيالىق دامۋ كورسەتكىشى جانە ادامزاتتىڭ بولاشاعى (ماتەماتيكالىق مودەلدەۋ جانە كومپيۋتەرلىك بولجاۋ)» تاقىرىبىن قامتىدى.
ءو.جولداسبەكوۆ اتىنداعى ستۋدەنتتەر سارايىندا وتكەن ەكىنشى ءدارىس «سيفرلىق ەكونوميكا (نۇسقالار مەن بولجامدار)» تاقىرىبىنا ارنالدى.
كەزدەسۋدى اشقان ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆ اسقار اقاي ۇلىنىڭ قىزمەتتىك جولىنا توقتالىپ، الەمدىك عىلىمداعى جەتىستىكتەرىن اتاپ ءوتتى.
اسقار اقايەۆ ءوز دارىسىندە دامىعان وزىق مەملەكەتتەردىڭ سيفرلىق ەكونوميكانى قۇرۋداعى تابىستارىنا تالداۋ جاساپ، دامۋشى ەلدەردىڭ ەكونوميكالىق باعىتتارىنا ساراپتاما جاسادى. «بۇگىندە ءداستۇرلى ەكونوميكاعا قاراعاندا اقپارات پەن بىلىمگە نەگىزدەلگەن سيفرلىق ەكونوميكانىڭ ماتەماتيكالىق تالداۋىمەن قارقىندى جۇمىس جۇرگىزىلۋدە. كلاسسيكالىق ەكونوميكالىق ديناميكا كوبب-دۋگلاس ءتيپىنىڭ وندىرىستىك فۋنكسياسىنا نەگىزدەلگەن، ول ءۇش نەگىزگى فاكتورعا – كاپيتالعا، ەڭبەككە جانە تەحنولوگيالىق پروگرەسكە بايلانىستى. ەڭ قيىن مىندەت – تەحنولوگيالىق پروگرەستى مودەلدەۋ.
سوندىقتان تەحنولوگيالىق پروگرەستىڭ ەكزوگەندىك جانە ەندوگەندىك مودەلدەرىن جاساعانى ءۇشىن نوبەل سىيلىعى ر.سولوۋ مەن پ. رومەرگە بەرىلدى. الايدا بۇل مودەلدەردە اقپارات ءوندىرىسىنىڭ ديناميكاسى جوق»، – دەدى پروفەسسور.
كورنەكتى عالىم اسقار اقايەۆ سيفرلىق ەكونوميكانىڭ بۇگىنى مەن بولاشاعى تۋرالى ءوز كوزقاراسىن ۇسىنا وتىرىپ، ءوزى ازىرلەگەن سيفرلىق داۋىرگە ارنالعان تەحنولوگيالىق پروگرەستىڭ اقپاراتتىق مودەلدەرى جانە سيفرلىق ەكونوميكاعا ارنالعان وندىرىستىك فۋنكسيا جايلى باياندادى. «ادام جانە ينتەللەكتۋالدى ماشينا ۇيلەسىمى سيفرلىق داۋىردە ەڭ ءونىمدى كۇشكە اينالماق». وسى سەنارييدى ىسكە اسىرۋ ءۇشىن ىرگەلى STEMء-بىلىم الۋ قاجەتتىگى ايتىلدى.
كوشباسشىلىق دارىسىندە ۇلكەن تاجىريبەسىمەن بولىسكەن اكادەميك اسقار اقايەۆ وقىتۋشى-پروفەسسورلار مەن ءبىلىم الۋشى جاستاردىڭ سۇراقتارىنا جاۋاپ بەردى.
جيىندا ءسوز العان ق ر ۇعا پرەزيدەنتى مۇرات جۇرىنوۆ اسقار اقاي ۇلىنىڭ قازاقستان رەسپۋبليكاسى ۇلتتىق عىلىم اكادەمياسىنىڭ مۇشە-اكادەميگى بولىپ قابىلدانعانىن قۋانىشپەن جەتكىزىپ، ارنايى كۋالىك تابىس ەتتى.
قازاقستان رەسپۋبليكاسى مەن قىرعىز رەسپۋبليكاسىنىڭ حالىق ءارتىسى، مەملەكەتتىك سىيلىقتىڭ لاۋرەاتى التىنبەك قورازبايەۆ «نارىننان جازعان سالەم حات» ءانىن ورىنداپ، اننەن شاشۋ شاشتى.
قادىرمەندى قوناق قازۇۋ باسشىلىعىنا قوناقجايلىلىعى ءۇشىن العىس بىلدىرە وتىرىپ، قازاقستان مەن ورتالىق ازياداعى جەتەكشى ۋنيۆەرسيتەتتە كوشباسشىلىق ءدارىس وقىعانىنا ريزاشىلىعىن ءبىلدىردى.
كەزدەسۋ سوڭىندا رەكتور جانسەيىت تۇيمەبايەۆ قازۇۋ عىلىمي كەڭەسىنىڭ شەشىمىمەن اسقار اقايەۆتى قازۇۋ-دىڭ «ءال-فارابي» التىن مەدالىمەن ماراپاتتادى.
كوشباسشىلىق دارىستەرگە ق ر ۇعا اكادەميكتەرى، بەلگىلى عالىمدار، عزي باسشىلارى، قازۇۋ ديرەكتورلار كەڭەسىنىڭ مۇشەلەرى، قالامگەرلەر، ونەر قايراتكەرلەرى، ب ا ق وكىلدەرى، ءبىلىم ورداسىنىڭ وقىتۋشى-پروفەسسورلار قۇرامى مەن ستۋدەنتتەرى قاتىستى.
سونداي-اق قۇرمەتتى قوناق ساپار بارىسىندا قازۇۋ مۇراجايىمەن تانىسىپ، سوڭعى ۇلگىدەگى وقۋ عيماراتتارىن، جاڭارعان اۋديتوريالاردى، عىلىمي لابوراتوريا مەن زەرتتەۋ ورتالىقتارىن ارالادى.
ءال-فارابي اتىنداعى قازۇۋ-دىڭ باسپا ءسوز قىزمەتى
