جاستاردىڭ دەنساۋلىعىنا، قاجىر-قايراتىنا، مىنەز-قۇلقىنا ءجىتى نازار اۋدارىلادى. شىلدەنىڭ ورتاسىندا باستالعان قورعانىس مينيسترلىگىنىڭ كۋرسانت قابىلداۋ ناۋقانى تامىزدىڭ ورتاسىنا تامان مارەسىنە جەتپەك.
ايتا كەتەلىك، ەلىمىزدە اسكەري ءبىلىم بەرەتىن، مامانداندىرىلعان ءۇش ينستيتۋت بار.
بۇلار: اقتوبە قالاسىنداعى ت.بيگەلدينوۆ اتىنداعى اۋە قورعانىسى اسكەري ينستيتۋتى مەن الماتىدا ورنالاسقان س.نۇرماعامبەتوۆ اتىنداعى قۇرلىق اسكەرى ينستيتۋتى جانە دە بايلانىس جانە راديەلەكترونيكا ينستيتۋتى.
وسىناۋ وقۋ ورىندارىنا قۇجات تاپسىرىپ، سىناقتان وتكەن كۋرسانتتار ءتورت مەزگىل تەگىن تاماقپەن، قاراجاتپەن، كيىم-كەشەكپەن ءارى قاجەتتى وقۋ ادەبيەتىمەن قامتاماسىز ەتىلىپ، اسكەري ءبىلىمنىڭ قىر-سىرىن مەڭگەرىپ شىعادى.
ناقتىلاپ ايتار بولساق، ينستيتۋتقا قابىلداۋ باس-اياعى 4 كەزەڭنەن تۇرادى.
باستاپقى كەزەڭدە، جاستاردىڭ پسيحولوگيالىق تۇراقتىلىعىن زەردەلەيتىن ىرىكتەۋ جۇرگىزىلەدى. بۇل كەزەڭنەن وتكەندەر ءۇشىن كەلەسى كەزەكتە مەديسينالىق تەكسەرۋ جۇرگىزىلەدى، دارىگەرلىك ساراپتاما تاعايىندالىپ، بولاشاق كۋرسانتتىڭ ءتان ساۋلىعى نازارعا الىنادى.
ال ءۇشىنشى ساتىدا سپورتقا بەيىمدىلىگى تەكسەرىلەدى، شىنىققان، شىمىر جاستارعا باسىمدىق بەرىلەدى. ەڭ اياعىندا 5 تامىز كۇنى جوو كۋرسانتتىعىنا قابىلداۋ بايقاۋى جۇرگىزىلەدى.
كوميسسياسىنىڭ ۇيعارىمى كەلەسى كۇنى جاريالانىپ، وقۋعا تۇسكەن كۋرسانتتار ءتىزىمى ينستيتۋتتىڭ رەسمي سايتىندا جارىق كورەدى. ال 8ء-شى تامىزدا وقۋ ورنى باسشىسىنىڭ بۇيرىعى نەگىزىندە كوميسسيانىڭ سوڭعى ءارى ناقتى شەشىمى قابىلدانادى.
بۇعان دەيىن Dalanews.kz ىلگەرىدەگى وقۋ ورىندارىندا ءبىلىم بەرۋدىڭ زاماناۋي ستاندارتى ەنگىزىلىپ، وقىتۋشىلار قۇرامى جاڭارعانىن حابارلاعان بولاتىن.
وسىناۋ ينستيتۋتتاردا ءبىلىم العان ساربازدار ەلىمىزدىڭ قورعانىس مينيسترلىگىندە، ۇلتتىق قاۋىپسىزدىك قىزمەتىنىڭ شەكارا قىزمەتىندە، توتەنشە جاعدايلار سالاسىندا تالماي تەر توگىپ ءجۇر.
"كۋرسانتتىق كەزەڭنەن لەيتەنانتتىققا" دەيىنگى 4 جىلدا وڭ-سولىن تانىپ، اسكەري سالانىڭ ىستىق-سۋىعىن سەزىنگەن جاستار ۇلكەن ءومىردىڭ سىناعىنا توتەپ بەرەدى. وقۋعا قابىلدانعان كۋرسانتتار تەك اسكەري بىلىممەن عانا شەكتەلمەيدى. ءبىرىنشى كەزەكتە ولار پاتريوتيزمنەن ءدارىس بەرىلەدى. وتانعا ادال قىزمەت ەتۋ ۇلكەن مارتەبە ەكەنىن ۇيرەتەمىز. ال انت بەرۋ راسىمىنە كۋرسانتتاردىڭ اتا-اناسىنان بولەك سوعىس ارداگەرلەرى، اسكەري سالانىڭ تانىمال تۇلعالارى، قوعامدىق ۇيىمداردىڭ بەلسەندىلەرى قاتىسادى. بىلايشا ايتقاندا، بۇگىنگى ساربازدار اسكەري وقۋ-جاتتىعۋدان بولەك، تاريحي-مادەني، ۇلتتىق قۇندىلىقتاردى مەڭگەرىپ شىعۋى كەرەك"، – دەيدى بۇل رەتتە پولكوۆنيك جۇمابەك احمەت ۇلى.
سوڭعى جىلدارى ەلىمىزدە اسكەري كادرلار تاربيەلەۋ ىسىندە وڭ وزگەرىستەر ورىن الۋدا. سونىڭ ىشىندە حالىقارالىق ارىپتەستىك جولعا قويىلىپ جاتىر. قازاقستاندىق كۋرسانتتار رەسەيدىڭ ىرگەلى ينستيتۋتتارىندا ءبىلىم الۋ، تالابىن شىڭداۋدا. بۇل ءۇردىس بيىل دا جالعاسىن تابادى. بيىل كۋرسانتتاردى شەتەلدىڭ اسكەري ينستيتۋتىنا جىبەرۋدە ءبىرقاتار وزگەرىس بولعانىن ايتا كەتۋ قاجەت.
بۇدان بىلاي شەت ەلدىڭ اسكەري وقۋ ورنىنا ءتۇسۋ ءۇشىن الدىمەن قورعانىس مينيسترلىگىنە قاراستى ىلگەرىدەگى ءۇش ينستيتۋتتىڭ بىرىنە، ءبىرىنشى كۋرسقا قابىلدانۋ قاجەت.
