Jastardyń densaýlyǵyna, qajyr-qairatyna, minez-qulqyna jiti nazar aýdarylady. Shildeniń ortasynda bastalǵan Qorǵanys ministrliginiń kýrsant qabyldaý naýqany tamyzdyń ortasyna taman máresine jetpek.
Aita ketelik, elimizde áskeri bilim beretin, mamandandyrylǵan úsh institýt bar.
Bular: Aqtóbe qalasyndaǵy T.Bigeldinov atyndaǵy Áýe qorǵanysy áskeri institýty men Almatyda ornalasqan S.Nurmaǵambetov atyndaǵy Qurlyq áskeri institýty jáne de Bailanys jáne radielektronika institýty.
Osynaý oqý oryndaryna qujat tapsyryp, synaqtan ótken kýrsanttar tórt mezgil tegin tamaqpen, qarajatpen, kiim-keshekpen ári qajetti oqý ádebietimen qamtamasyz etilip, áskeri bilimniń qyr-syryn meńgerip shyǵady.
Naqtylap aitar bolsaq, institýtqa qabyldaý bas-aiaǵy 4 kezeńnen turady.
Bastapqy kezeńde, jastardyń psihologiialyq turaqtylyǵyn zerdeleitin irikteý júrgiziledi. Bul kezeńnen ótkender úshin kelesi kezekte meditsinalyq tekserý júrgiziledi, dárigerlik saraptama taǵaiyndalyp, bolashaq kýrsanttyń tán saýlyǵy nazarǵa alynady.
Al úshinshi satyda sportqa beiimdiligi tekseriledi, shynyqqan, shymyr jastarǵa basymdyq beriledi. Eń aiaǵynda 5 tamyz kúni JOO kýrsanttyǵyna qabyldaý baiqaýy júrgiziledi.
Komissiiasynyń uiǵarymy kelesi kúni jariialanyp, oqýǵa túsken kýrsanttar tizimi institýttyń resmi saitynda jaryq kóredi. Al 8-shi tamyzda oqý orny basshysynyń buiryǵy negizinde komissiianyń sońǵy ári naqty sheshimi qabyldanady.
Buǵan deiin Dalanews.kz ilgeridegi oqý oryndarynda bilim berýdiń zamanaýi standarty engizilip, oqytýshylar quramy jańarǵanyn habarlaǵan bolatyn.
Osynaý institýttarda bilim alǵan sarbazdar elimizdiń Qorǵanys ministrliginde, Ulttyq qaýipsizdik qyzmetiniń Shekara qyzmetinde, Tótenshe jaǵdailar salasynda talmai ter tógip júr.
"Kýrsanttyq kezeńnen leitenanttyqqa" deiingi 4 jylda oń-solyn tanyp, áskeri salanyń ystyq-sýyǵyn sezingen jastar úlken ómirdiń synaǵyna tótep beredi. Oqýǵa qabyldanǵan kýrsanttar tek áskeri bilimmen ǵana shektelmeidi. Birinshi kezekte olar patriotizmnen dáris beriledi. Otanǵa adal qyzmet etý úlken mártebe ekenin úiretemiz. Al ant berý rásimine kýrsanttardyń ata-anasynan bólek soǵys ardagerleri, áskeri salanyń tanymal tulǵalary, qoǵamdyq uiymdardyń belsendileri qatysady. Bylaisha aitqanda, búgingi sarbazdar áskeri oqý-jattyǵýdan bólek, tarihi-mádeni, ulttyq qundylyqtardy meńgerip shyǵýy kerek", – deidi bul rette polkovnik Jumabek Ahmetuly.
Sońǵy jyldary elimizde áskeri kadrlar tárbieleý isinde oń ózgerister oryn alýda. Sonyń ishinde halyqaralyq áriptestik jolǵa qoiylyp jatyr. Qazaqstandyq kýrsanttar Reseidiń irgeli institýttarynda bilim alý, talabyn shyńdaýda. Bul úrdis biyl da jalǵasyn tabady. Biyl kýrsanttardy sheteldiń áskeri institýtyna jiberýde birqatar ózgeris bolǵanyn aita ketý qajet.
Budan bylai shet eldiń áskeri oqý ornyna túsý úshin aldymen Qorǵanys ministrligine qarasty ilgeridegi úsh institýttyń birine, birinshi kýrsqa qabyldaný qajet.
