اسىق اتۋ مەن بەس اسىقتان قازاقستان ۇلتتىق قۇراماسى بۋرابايدا 5ء-شى دۇنيەجۇزىلىك كوشپەندىلەر ويىندارى قارساڭىنداعى كەزەكتى وقۋ-جاتتىعۋ جيىنىن باستادى.

25 شىلدەگە دەيىن سوزىلاتىن وقۋ-جاتتىعۋ جيىنى ششۋچينسك قالاسىنداعى قىسقى سپورت تۇرلەرىنەن رەسپۋبليكالىق وليمپيادالىق دايارلاۋ ورتالىعىنىڭ بازاسىندا ءوتىپ جاتىر.

«وقۋ-جاتتىعۋ جيىنىنا استانا، شىمكەنت قالالارى مەن اقمولا، اقتوبە، پاۆلودار، تۇركىستان وبلىستارىنان كەلگەن ۇلتتىق قۇراما مۇشەلەرى جينالدى. مۇندا اسىقشىلاردىڭ الاڭسىز جاتتىعۋ جاساپ، 5ء-شى دۇنيەجۇزىلىك كوشپەندىلەر ويىندارىنا تىڭعىلىقتى دايىندالۋىنا بارلىق جاعداي جاسالعان. اتالعان بايراقتى باسەكەدە جەڭىمپاز اتانۋ ءۇشىن بار كۇشىمىزدى سالامىز»، - دەدى اسىق اتۋدان قازاقستان ۇلتتىق قۇراماسىنىڭ باس باپكەرى جومارت سابىرجان ۇلى.

بۇل – اسىقشىلاردىڭ جىل باسىنان بەرى وتكىزىپ جاتقان ءتورتىنشى وقۋ-جاتتىعۋ جيىنى. سوڭعى جيىن 5ء-شى دۇنيەجۇزىلىك كوشپەندىلەر ويىندارى الدىندا استانا قالاسىندا وتەدى دەپ جوسپارلانعان.

ەسكە سالا كەتەيىك، رەسپۋبليكالىق اسىق اتۋ فەدەراسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە بايگە، كوكپار، اۋدارىسپاق، ساداق اتۋ، جامبى اتۋ، قۇسبەگىلىك، توعىزقۇمالاق، تەڭگە ءىلۋ، «JORYQ» ات سپورتى فەدەراسيالارى بار. ق ر ۇلتتىق سپورت قاۋىمداستىعىن بەلگىلى كاسىپكەر، مەسەنات، «Altyn Qyran Foundation» قوعامدىق قورى قامقورشىلىق كەڭەسىنىڭ ءتوراعاسى يسلامبەك سالجانوۆ باسقارادى.