Asyq atý men bes asyqtan Qazaqstan ulttyq quramasy Býrabaida 5-shi Dúniejúzilik kóshpendiler oiyndary qarsańyndaǵy kezekti oqý-jattyǵý jiynyn bastady.
25 shildege deiin sozylatyn oqý-jattyǵý jiyny Shýchinsk qalasyndaǵy Qysqy sport túrlerinen respýblikalyq olimpiadalyq daiarlaý ortalyǵynyń bazasynda ótip jatyr.
«Oqý-jattyǵý jiynyna Astana, Shymkent qalalary men Aqmola, Aqtóbe, Pavlodar, Túrkistan oblystarynan kelgen ulttyq qurama músheleri jinaldy. Munda asyqshylardyń alańsyz jattyǵý jasap, 5-shi Dúniejúzilik kóshpendiler oiyndaryna tyńǵylyqty daiyndalýyna barlyq jaǵdai jasalǵan. Atalǵan bairaqty básekede jeńimpaz ataný úshin bar kúshimizdi salamyz», - dedi Asyq atýdan Qazaqstan ulttyq quramasynyń bas bapkeri Jomart Sabyrjanuly.
Bul – asyqshylardyń jyl basynan beri ótkizip jatqan tórtinshi oqý-jattyǵý jiyny. Sońǵy jiyn 5-shi Dúniejúzilik kóshpendiler oiyndary aldynda Astana qalasynda ótedi dep josparlanǵan.
Eske sala keteiik, Respýblikalyq asyq atý federatsiiasy Qazaqstan Respýblikasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báige, kókpar, aýdaryspaq, sadaq atý, jamby atý, qusbegilik, toǵyzqumalaq, teńge ilý, «JORYQ» at sporty federatsiialary bar. QR Ulttyq sport qaýymdastyǵyn belgili kásipker, metsenat, «Altyn Qyran Foundation» Qoǵamdyq qory Qamqorshylyq keńesiniń tóraǵasy Islambek Saljanov basqarady.
