قاماۋعا الىنعان اۋرۋحانانىڭ باس دارىگەرى قانات تەزەكبايەۆتىڭ ايەلى ءازىر نيۋ-يوركتە جۇرگەن توقايەۆتان اراشا سۇراپ، تەرگەۋدىڭ سەرىك كۇدەبايەۆتىڭ (الماتى قالاسى پوليسيا دەپارتامەنتىنىڭ باسشىسى) ۇلى قايتىس بولعان سوڭ جانە ەشبىر نەگىزسىز، دالەلسىز باستالىپ كەتكەنىنە شاعىمداندى، دەپ حابارلايدى Dalanews.kz.
دينا تەزەكبايەۆانىڭ ايتۋىنشا، جازدىڭ ورتاسىندا 29 جاستاعى نۇرسۇلتان كۇدەبايەۆ جول-كولىك اپاتىنا ءتۇسىپ، №4 اۋرۋحاناعا جەتكىزىلگەن. وعان سول ارادا وتا جاسالعان. كەيىننەن شۇعىل تۇردە گەرمانياداعى اۋرۋحاناعا جەتكىزىلىپ، سول كوز جۇمعان.
"كۇدەبايەۆتىڭ ۇلى قايتىس بولعاننان كەيىن، وپەراسيادان كەيىن 26 كۇن وتكەسىن، جولداسىمدى سەبەبىن ايتپاستان №4 اۋرۋحانانىڭ باس دارىگەرى قىزمەتىنەن بوساتىپ، كەپىلدىكپەن بوساپ شىعۋ قۇقىعىنان ايىرىپ، قاماۋعا الىپ تىندى.
-№4 اۋرۋحانادا جول-كولىك اپاتىنا تۇسكەن نۇرسۇلتان كۇدەبايەۆقا وپەراسيا جاسالعان كەزدە كۇيەۋىم ەكى كومەكشىنىڭ ءبىرى بولدى جانە وتا جاساعان حيرۋرگپەن، تاعى ءبىر كومەكشىمەن، انەستەزيولوگ-دارىگەر جانە مەدبيكەمەن بىرگە ءبىر پالاتادا بولعان. ول وتانىڭ ناتيجەسىنە تىكەلەي جاۋاپ بەرمەيدى.، - دەيدى باس دارىگەردىڭ جۇبايى.
دينا تەزەكبايەۆا تەرگەۋ كۇدەبايەۆتىڭ ۇلىنىڭ ولىمىنە دارىگەر سالعىرتتىعى سەبەپ بولعان دالەلدەر ۇسىنعان جوق، دەپ ەسەپتەيدى.
"كەرەك دەسەڭىزدەر مارقۇمنىڭ جۇرەگىنىڭ توقتاپ قالۋىنا جاۋىرىنى مەن بۇعاناسىنا جاسالعان وپەراسيا كەرى اسەر ەتتى دەگەن تىكەلەي دالەل جوق"، - دەيدى دينا تەزەكبايەۆا
ال ءازىر نيۋ-يوركتە جۇرگەن قازاقستان پرەزيدەنتى twitter-ىندە وسى وقيعاعا بايلانىستى پىكىر ءبىلدىردى.
"مەن نيۋ-يوركتە ءجۇرىپ، گەرمانيادا ناۋقاستىڭ قايتىس بولۋىنا بايلانىستى الماتىنىڭ 4ء-شى قالالىق اۋرۋحاناسىنىڭ باس دارىگەرى مەن انەستەزيولوگىنىڭ ۇستالۋى تۋرالى دارىگەرلەر قاۋىمىنىڭ حاتىن وقىدىم.
ءبارىن زاڭعا سايكەس تەكسەرۋدى تاپسىردىم. پرەزيدەنت اكىمشىلىگى، ق ر دەنساۋلىق ساقتاۋ مينيسترلىگى، الماتى قالاسىنىڭ اكىمى بۇل ءىستى باقىلاۋىنا الدى"، دەگەن جازبا شىقتى ق ر پرەزيدەنتى قاسىم-جومارت توقايەۆتىڭ twitter-دەگى پاراقشاسىندا.
https://twitter.com/TokayevKZ/status/1176794561273839616
تەزەكبايەۆتىڭ ارىپتەستەرى دارىگەردى كەپىلدىكپەن بوساتۋدى تالاپ ەتۋدە. دارىگەردىڭ دوسى، ءارى ارىپتەسى قايرات سماعۇلوۆ Nur Otan پارتياسى ءتوراعاسىنىڭ ورىنباسارى باۋىرجان بايبەككە حات جولداپتى.
"بۇكىل عۇمىرىن ادامعا ارناعان، اجال ۇشىندا تۇرعان تالاي تاعدىردىڭ ءومىرىن امان ساقتاپ قالعان دارىگەردى اباقتىعا جابۋ كىمگە كەرەك بولدى؟ ونى تەرگەۋ يزولياتورىنا قاماۋدىڭ قاجەتى بار ما ەدى؟ ءبىز ونىڭ اقتالىپ شىعارىنا سەنەمىز. الايدا مۇنداي اۋىر سوققىدان كەيىن ونىڭ كۇردەلى وپەراسيا جاساۋى نەعايبىل...، - دەيدى سماعۇلوۆ.
ايتا كەتسەك، نۇرسۇلتان كۇدەبايەۆ 2019 جىلى تامىز ايىنىڭ اياعىندا قايتىس بولدى. ول الاتاۋ اۋدانى پروكۋرورىنىڭ ورىنباسارى قىزمەتىن اتقارعان. نۇرسۇلتان كۇدەبايەۆتىڭ ارتىندا ءۇش بالاسى قالدى.
قاماۋعا الىنعان №4 اۋرۋحانانىڭ باس دارىگەرى مەن انەستەزيولوگىنا "مەديسينالىق جانە فارماسيەۆتيكالىق قىزمەتكەردىڭ كاسىبي مىندەتىن ءتيىستى دەڭگەيدە ورىنداماعانى ءۇشىن" دەگەن ايىپ تاعىلدى.
