"ارتىق قىلام دەپ، تىرتىق قىلدى". ەكس-مينيستردىڭ ايەلى دە ءىستى بولىپ جاتىر

Dalanews 19 قاڭ. 2024 09:26 2573

استانادا بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى مەن ونىڭ ايەلى عاليا ىسقاقوۆاعا، سونىمەن قاتار ادۆوكاتى بولعان مۇستاحيم تولەيەۆكە قاتىستى سوت وتىرىسى باستالدى، دەپ حابارلايدى Dalanews.kz.

ەكس-شەنەۋنىك 2023 جىلى 20 ماۋسىمدا اسا ءىرى كولەمدە پارا الدى دەگەن كۇدىكپەن باس بوستاندىعىنان ايىرىلدى. كەيىن ونىڭ ادۆوكاتى مۇستاحيم تولەيەۆكە دە الاياقتىق جاسادى دەگەن ايىپ تاعىلدى.


سونىمەن قاتار سىبايلاس جەمقورلىققا قارسى ءىس-قيمىل اگەنتتىگى مۇحامەدي ۇلىنىڭ جۇبايى عاليا ىسقاقوۆا پارا بەرۋگە وقتالعانىن مالىمدەدى.


انتيكوردىڭ حابارلاۋىنشا، تولەيەۆ ەكس-شەنەۋنىكتىڭ جازاسىن جەڭىلدەتۋ جانە قاماۋدان بوساتۋ ءۇشىن ونىڭ ايەلىنەن 460 مىڭ دوللار كولەمىندە پارا الىپ، ونى سوتتىڭ لاۋازىمدى قىزمەتكەرلەرىنە ۇسىنباق بولعان. تەرگەۋ بارىسىندا اتالمىش سومانىڭ 255 مىڭ دوللارى تاركىلەندى.


كەيىن ارىستانبەك مۇحامەديۇلىنا قاتىستى تاعى ءبىر سوت وتىرىسى ءوتتى.


وسىعان بايلانىستى ەلوردادا ارىستانبەك مۇحامەدي ۇلى، ولجاس حايرۋللايەۆ، اباي ساتىبالدين، لەونيد كوچەتوۆ، الماس نۇرازحان، ازامات كوشەنوۆ، ايىم ءسادۋاقاسوۆا جانە گۇلزات جۋاسپايەۆاعا قاتىستى نەگىزگى سوت پروسەسى جالعاسۋدا. تەرگەۋدە ەكى ماسەلە قاراستىرىلۋدا. ءبىرى - “ديپلومات” قوناقۇيىنە جاسالعان رەيد، ەكىنشىسى - “التىن ادامنىڭ شەرۋى” كورمەسىن وتكىزۋگە بايلانىستى تەرگەۋ. ايىپتاۋشى تاراپ كورمەگە قاتىستى جاڭا جاعدايلاردىڭ انىقتالعانىن ايتتى. الايدا ايىپتالۋشىلار كىناسىن مويىنداۋدان باس تارتىپ وتىر.


تەرگەۋشىلەردىڭ ايتۋىنشا، بۇرىنعى قوجايىن 2019 جىلى مۇحامەديۇلىنان كومەك سۇراعان. وسى تۇستا مۇحامەدي ۇلى جابىرلەنۋشىگە 2،5 ميلليارد تەڭگە ءبولىپ، كاسىپتىڭ 71 پايىزىن سەنىمدى باسقارۋشىعا بەرۋدى تالاپ ەتكەن. سودان سوڭ ەكس-شەنەۋنىك ءقوناقۇيدى تۇگەل باقىلاۋعا الۋدى ۇيعارعان.


2023 جىلدىڭ 20 ماۋسىمىندا “التىن ادامنىڭ الەم مۋزەيلەرىنە شەرۋى” حالىقارالىق كورمەسىنىڭ جوباسىن جۇزەگە اسىرۋ كەزىندە قارجى جىمقىرعانى ءۇشىن ارىستانبەك مۇحامەدي ۇلى ءومىر بويىنا مەملەكەتتىك قىزمەتتە ەڭبەك ەتۋ قۇقىعىنان ايىرىلىپ، 8 جىلعا قاماۋعا الىندى. سونداي-اق مەملەكەتتىك ناگرادالارىنان دا ايىرىلدى. ال ونىڭ ورىنباسارى الماس نۇرازحان، “ەكسپونات” ج ش س ديرەكتورى ازامات كوشەنوۆ جانە وسى كومپانيانىڭ ەسەپشىسى ايىم ءسادۋاقاسوۆا 7 جىلعا باس بوستاندىعىنان ايىرىلدى. سوت مادەنيەت مينيسترلىگىنىڭ ازاماتتىق تالاپ ارىزىن ءىشىنارا قاناعاتتاندىرىپ، 43 ميلليون تەڭگەنى بىرلەسىپ ءوندىرۋدى مىندەتتەدى.


2023 جىلدىڭ 5 شىلدەسىندە مۇحامەدي ۇلىنىڭ ادۆوكاتى مۇستاحيم تولەيەۆ ەكى ايعا قاماۋعا الىندى.


ول بۇرىنعى مادەنيەت ءمينيسترىنىڭ ءىسى بويىنشا پارا الدى دەگەن كۇدىككە ءىلىندى. شەنەۋنىكتىڭ ايەلى عاليا ىسقاقوۆا دا تەرگەلدى. انتيكور بۇرىنعى مادەنيەت ءمينيسترىنىڭ «كوشپەندى» ءفيلمى ءۇشىن بەكىنىستىڭ ساتىلۋىنا قاتىستىلىعىن تەكسەرىپ جاتىر.


2024 جىلدىڭ قاڭتارىندا قىلمىستىق ءىس سوتقا ءتۇستى.


ارىستانبەك مۇحامەدي ۇلى قىلمىستىق كودەكستىڭ 24-بابى 3-بولىگى (قىلمىسقا وقتالۋ) – 367-بابى 4-بولىگى (پارا بەرۋ) بويىنشا كۇدىككە ىلىنگەن. ايەلى عاليا ىسقاقوۆا 368-باپتىڭ 1-بولىگى (پاراقورلىققا دەلدال بولۋ)، مۇستاقىم تولەيەۆ 190-باپتىڭ 4-بولىگى 2-تارماعى (الاياقتىق) بويىنشا سوتقا تارتىلعان. سوت وتىرىسىندا ادۆوكات قىلمىستىق-پروسەستىك كودەكستىڭ تالاپتارى بۇزىلعانىن العا تارتىپ، ءىستى پروكۋراتۋراعا قايتارۋدى سۇرادى. ال عاليا ىسقاقوۆاعا قاتىستى “ءۇيقاماقتا ۇستاۋ” تۇرىندەگى بۇلتارتپاۋ شاراسىن “ەلدەن شىقپاۋ تۇرىندەگى قولحاتقا” اۋىستىرۋدى سۇرادى.


ەسكە سالايىق، ەكس-شەنەۋنىك ارىستانبەك مۇحامەديۇلىنا قاتىستى 2023 جىلدان بەرى بىرنەشە قىلمىستىق ءىس سوتتا قارالىپ جاتىر. ۇلتتىق مۋزەيگە قاتىستى ءىس بويىنشا ەكس-مينيستر 8 جىلعا سوتتالدى. 


سۋرەت “ازاتتىق راديوسىنان” الىندى

ۇسىنىلعان
سوڭعى جاڭالىقتار