قازاقستاندىق Qazaqstan Steel Group اتىنان كاسىپكەر اندرەي لاۆرەنتيەۆ قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگىمەن ArcelorMittalTemirtau اكتيۆتەرىن ساتىپ الۋ تۋرالى كەلىسىمگە قول جەتكىزدى.
كەلىسىم شارتتارى بويىنشا QSG امت اكتيۆتەرى 286 ملن اقش دوللارىنا ساتىپ الىندى، سونداي-اق جىل سايىنعى 4 رەت تەڭ جارنامەن تولەنەتىن 450 ملن دوللار مولشەرىندەگى قاراجات كەپىلدى تۇردە كەيىنگە قالدىرىلعان تولەمدەردى جۇزەگە اسىرادى. سونىمەن قاتار، كەلىسىم جابىلعان كەزدە تاعى امت-نىڭ وتەلمەگەن توپىشىلىك قارىزىن تولەۋ رەتىندە 250 ميلليون دوللار تولەنەدى.
سول سياقتى كەيىننەن 3 ملرد دوللاردان استام قارجىنى ينۆەستيسيالاۋ بويىنشا مىندەتتەمەلەردى وزىنە الادى، ونىڭ ىشىندە 1،3 ملرد-ى كەلەسى جىلى ينۆەستيسيالاناتىن بولادى.
ۇلتتىق ينۆەستور قىسقا مەرزىم ىشىندە كەلەسى مىندەتتەمەلەردى ءوز جاۋاپكەرشىلىگىنە الىپ وتىر:
- جۇمىس بارىسىنداعى ۇجىمدىق كەلىسىمشارت پەن كاسىپورىن جۇمىسشىلارىنىڭ ەڭبەكاقىسىن تولەۋ جۇيەسىنىڭ ساقتالۋىن؛
- ءوندىرىس ورنىنىڭ قاۋىپسىزدىگىن جانە ەكولوگيالىق احۋالىن ودان ءارى جاقسارتۋ؛
- ءوندىرىستى جاڭعىرتۋ جانە قايتا ۇيىمداستىرۋ؛
- شىعارىلاتىن ءونىم كولەمىن، نومەنكلاتۋراسىن جانە تۇرلەرىن ۇلعايتۋ.
كومپانيا كاسىپورىننىڭ قىزمەتىنە تالداۋ جۇرگىزگەننەن كەيىن ناقتى مالىمەتتەردى ينۆەستوردىڭ رەسمي وكىلدەرى ارقىلى بەرەتىنىن حابارلايدى.
ايتا كەتەيىك، بۇل تۋرالى بۇگىن ونەركاسىپ جانە قۇرىلىس ءمينيسترى قانات شارلاپايەۆ تا استانادا بريفينگ وتكىزىپ «جاڭا ينۆەستور بويىنشا، بۇل – Allur كومپانيالار توبى، اندرەي سەرگەيەۆيچ لاۆرەنتيەۆ. ولار زاۋىتقا يەلىك ەتۋ قۇقىعىنا الداعى بىر-ەكى كۇندە كىرىسەدى»، – دەپ مالىمدەدى. اندرەي لاۆرەنتيەۆ – Allur كومپانيالار توبى ديرەكتورلار كەڭەسىنىڭ ءتوراعاسى. ونىڭ كومپانيالار توبىنا «اگروماشحولدينگ» جانە «سارىارقااۆتوپروم» ج ش س كىرەدى.
