ءقازىر قازاقستاندا ورىس انشىلەرىنىڭ داڭقى اسقاقتاپ تۇر. اپتا سايىن الىستاعى ماسكەۋدەن كەلگەن ءبىر ءانشىنىڭ كونسەرتىن تاماشالايتىن بولدىق. ولاردىڭ قولداۋشىلارى مەن دەمەۋشىلەرى دە تابىلا كەتەدى. الماتىنىڭ ايدىك ءبىر مەيرامحاناسى «قۇرمەتتى مەيماننىڭ» باستى كۇتۋشىسى بولسا، كەلەسى ءبىر قوناق ءۇي الگى ءانشىنىڭ جامباسپۇلىن كوتەرىپ الىپ، مىرزالىق جاساپ جاتقانى. ءتىپتى، ەلىمىزدىڭ تىركەلگەن اۋە كومپانيالارى جول شىعىنىن كوتەرىپ العاندارىن جارىسا جارنامالاعاندا، جىنىڭ كەلەدى ەكەن. ءيا، ءقازىر نارىق زامانى. كەز كەلگەن پروديۋسەرلىك ورتالىق قالاعان جۇلدىزىن قازاقستانعا الدىرىپ، مۇنداعى «سۇيىكتى تىڭداۋشىلارىنىڭ» كوڭىلىن كوتەرۋىنە بولادى.

[caption id="attachment_12567" align="alignright" width="351"] اللا پۋگاچيەۆا[/caption]

ءبىراق مۇنداي داراقىلىق، جيىن-توي دەسە، ىشكەن اسىن جەرگە قوياتىن جاستارىمىزعا تەرىس تاربيە بەرەتىنى جاسىرىن ەمەس. سىرت ەلدەن كەلگەن انشىلەر مۇندا قازاقستانعا كەلىپ، ءوزىنىڭ مادەنيەتىن ناسيحاتتايدى. قازاقتىڭ قاي ءانشىسى رەسەيگە بارىپ، جەكە كونسەرتىن بەرىپ، ءان سالىپ جاتىر. ەشقايسىسى. انەۋ ءبىر جىلدارى روزا رىمبايەۆا قازاقستان مەن رەسەي اراسىنداعى دوستىق جىلى كەزىندە ءبىر رەت بارىپ ءان سالعانى ەسىمىزدە. بۇدان باسقا ماسكەۋدى باتىرحان شۇكەنوۆتىڭ مويىنداتقانىن بىلەمىز.

كۇنى كەشە عانا مەملەكەت باسشىسى ۇكىمەتتىڭ كەڭەيتىلگەن جيىنىندا قوينى-قونىشى اقشاعا تولعان قالتالىلار قالتاسىنا سىيماعان اقشاسىن ەل ەكونوميكاسىن وركەندەتۋگە جۇمساسىن دەپ ۇسىنىس ايتتى. ورىس انشىلەرىن قازاقستانعا ماگنيتتەي تارتاتىن ءورىستىلدى بايشىكەشتەردىڭ اقشاسى. قاراپايىم كوپشىلىك ءۇشىن ورىس انشىلەرىنىڭ قۇنى بەس تيىن. ورىسشا سويلەپ، ورىسشا ويلايتىندار قازاقتىڭ ءبىر ءانشىسىن تىڭدامايدى. ولار وزىنە قاجەتتى جان ازىعىن رەسەيدەن ىزدەيتىنى جاسىرىن ەمەس. بوتەن ەلدىڭ ءانشىسىنىڭ جولىنا قازاقستاندا تاپقان اقشاسىن شاشىپ جاتقانى.

بۇعان توسقاۋىل قويۋعا بولا ما؟  ارينە، بولادى. قازىرگى تاڭدا اتقارۋشى بيلىك قاي جەردەن قارجى تاۋىپ، بيۋدجەتتىڭ ءبۇيىرىن بۇلتيتۋدى ويلاپ باس قاتىرۋدا. داعدارىس كەزىندە كەز كەلگەن سالادا قارجى تارتۋدىڭ جولىن قاراستىرۋ ارتىقتىق ەتپەيدى. بىزدەر قارجى مەن ينۆەستيسيا تارتۋ تەك قانا اسەت يسەكەشيەۆ پەن باقىت سۇلتانوۆتىڭ ءىسى عانا دەپ ويلاماۋىمىز كەرەك. بىزدىڭشە، بۇل ىسكە مادەنيەت جانە سپورت ءمينيسترى ارىستانبەك مۇحامەديا ۇلى دا ۇلەس قوسۋى ءتيىس. ۇكىمەتتىڭ قارجىسىن يگەرۋدى بىلەتىن ارەكەڭ ءبىزدىڭ ۇسىنىسىمىزدى ەستىگەندە «اكەم-اۋ مەن قارجىنى قايدان تابام؟» دەپ شورشىپ  ءتۇسۋى مۇمكىن. شىندىعىندا، تابۋىنا بولادى. ارەكەڭ قازاق رۋحانياتىن وركەندەتۋگە شىنىمەن دە ىقىلاستى بولسا، سىرتتان كەلەتىن انشىلەرگە قوماقتى سالىق سالاتىن زاڭ جوباسىن دايىنداپ، پارلامەنتكە الىپ بارسىنشى، دەپۋتات بىتكەننىڭ ءبارى قوس قولىن كوتەرىپ قولدايتىنى انىق. سول كەزدە ەلىمىزگە كەلىپ، كوك قاعازدى قالتاعا باسىپ جۇرگەن ورىس انشىلەرى بۇلايشا تايرانداماس ەدى. قازاقستاندى تەك قانا تابىس كوزى سانايتىن كورشى ەلدىڭ انشىلەرى اياعىن بايقاپ باسار ەدى. ءبىراق بۇعان ارىستانبەك مىرزانىڭ ەرىك-جىگەرى جەتە قويا ما ەكەن؟

[caption id="attachment_12568" align="alignright" width="275"] ورىس ءانشىسى تيماتي[/caption]

قازاق حاندىعىنىڭ 550 جىلدىعىنا ارنالعان تەلەتوپتامىنا قارجىنىڭ جەتىمسىزدىگىنەن ساعىزشا سوزعان ارەكەڭ ورىس انشىلەرىنە ارىستانشا ايبات شەگىپ، قازاقتىڭ ىرىسىن قورعايدى دەگەنگە ەشكىم سەنە قويماس. ءبىراق بۇل ۇسىنىس ۇلتجاندى ازاماتتاردىڭ نازارىندا ءجۇرسىن دەپ ادەيى ايتىپ وتىرمىز.

بۇل رەتتە «سوندا سىرت ەلدىڭ انشىلەرىن كىرگىزبەيمىز بە؟» دەپ شورشىپ ءتۇسۋدىڭ قاجەتى جوق. ەڭ باستىسى ولاردىڭ قازاقستاننان تاپقان تابىسىنىڭ بەلگىلى ءبىر بولىگىن ەلدە قالدىرۋدى زاڭ جۇزىندە رەتتەۋ قاجەت. ەگەر مۇنداي شارا قولدانباساق، بولاشاقتا ورىس انشىلەرى قازاقستاننىڭ كورنەكتى ساحنالارىن جاۋلاپ، ءوز انشىلەرىمىز سىرتتا قالۋى مۇمكىن. ءقازىردىڭ وزىندە قازاق انشىلەرى ورىس انشىلەرىنىڭ شىلاۋىندا جۇرگەنى جاسىرىن ەمەس. ونجىلدىق ەسەپتى كونسەرتىن وتكىزەيىن دەپ وتىرعان ايدىك ءانشى قايرات نۇرتاستىڭ ءوزى «كونسەرتتىڭ قۇرمەتتى قوناعى – نيۋشا مەن تيماتي» دەپ جارنامالاپ جاتىر. قۇددى ءبىر نيۋشا مەن تيماتيدىڭ جەكە كونسەرتى وتەتىندەي.

مادەنيەت سالاسىنىڭ تىزگىنىن ۇستاعان ازاماتتاردىڭ بوستىعىنان ءقازىر ورىستىڭ ءاۋ دەپ ءان سالاتىن ءانشىسىماقتارى قازاقستاندى تابىس تابۋدىڭ كوزىنە اينالدىرىپ العان. سوندىقتان بۇعان زاڭ جۇزىندە شەكتەۋ قوياتىن كەز جەتتى.

نۇرلان جۇماحان