سونىمەن بىرگە قاجەتتى جيھازدارمەن جابدىقتالعان تۇز شاحتاسى، سەنسورلىق بولمە، ينتەرنەت-كافە، يوگا، ۇستەل تەننيسى، بيليارد، شاحمات، دويبى ويىندارى ايماقتارى مەن كىتاپحانا قىزمەتىن ۇسىنادى. زاماناۋي ۇلگىدە جابدىقتالعان، ەلىمىزدە تەڭدەسى جوق ارداگەرلەر ءۇيىنىڭ اشىلۋ سالتاناتىنا تۇركىستان وبلىسىنىڭ اكىمى ءومىرزاق شوكەيەۆ قاتىسىپ، قاريالاردىڭ قۋانىشىنا ورتاقتاستى.
– سانادان ەشقاشان وشپەيتىن ۇلى ەرلىك، بۇگىنگى تىنىشتىق بەسىگىن تەربەتكەن جەڭىمپاز جاستاردىڭ قايراتىن جانىپ، بەكەمدىگىن بەكىتە تۇسەتىندەي. اتالار ايبىنى – ءىزباسارلارعا امانات! ۇرپاقتار ساباقتاستىعىن ۇمىتپاي ەسكە سالىپ وتىراتىن وسى ءبىر قوس قۋانىش بارشامىز ءۇشىن دە وسىنىسىمەن قۇندى. ارداگەرلەرىمىز امان، جاستارىمىز وتانشىل بولسىن! ارىستىق ارداگەرلەر ءۇشىن جاسالعان وسىنداي يگى باستاما، ۇلگى بولار ءىس ءارى قاراي وزگە ايماقتاردا جالعاسىن تابادى دەپ سەنەمىن، – دەدى وبلىس اكىمى ءومىرزاق شوكەيەۆ.
ارىس قالاسىنىڭ ارداگەرلەرى ءۇشىن مەرەكەدە ۇلكەن تارتۋ بولىپ وتىرعان عيماراتتاعى ۇيلەستىرۋ جۇمىستارىن ارىس قالالىق جۇمىسپەن قامتۋ جانە الەۋمەتتىك باعدارلامالار بولىمىنە قاراستى «اسىل جۇرەك» الەۋمەتتىك ورتالىعى جۇزەگە اسىراتىن بولادى.
اسەم عيماراتتا قارتتاردىڭ باس قوسىپ، جيىن وتكىزۋلەرىنە، تىنىعىپ، شىعارماشىلىقپەن اينالىسۋى ءۇشىن بارلىق جاعدايلار جاسالعان. تەراپيەۆت دارىگەرى مەن ەمدىك ماسساج ءبولىمى جۇمىس ىستەيدى. ارىس قالاسىنداعى 6 مىڭنان استام ارداگەر ءۇشىن بۇل ورتالىقتىڭ اشىلۋى ۇلكەن قۋانىش. سەبەبى بۇعان دەيىن ارداگەرلەرگە ارنالعان مۇنداي ورىندار بولماعان. ايتا كەتۋ كەرەك، ەكى قاباتتان تۇراتىن ارداگەرلەر ورتالىعى عيماراتىنىڭ ءبىر بولىگى "نەكە سارايى" رەتىندە ءوز جۇمىسىن باستادى. وبلىس اكىمى اقساقالدارمەن جۇزدەسىپ، ولاردى جەڭىس كۇنىمەن قۇتتىقتادى. شارا بارىسىندا سانيتارلىق تالاپتار قاتاڭ ساقتالدى.
ارىس قالاسىنا جۇمىس ساپارىندا وبلىس اكىمى ءومىرزاق شوكەيەۆ رەسەي نارىعىنا جول اشقان اقدالا اۋىلدىق وكرۋگىندەگى جەكە كاسىپكەر راحىمجان كەنجەبايەۆتىڭ جىلىجاي كەشەنىندە بولدى. جىلىنا ەكى مارتە قىزاناق پەن قيار ونىمدەرىن ەلىمىزدىڭ بىرنەشە وبلىستارىمەن قاتار، رەسەيگە ەكسپورتتاپ وتىرعان كاسىپكەر جىلىنا 200 تونناعا جۋىق ءونىم شىعارادى. كاسىبىن 25 سوتتىق جەردەن باستاپ، جىلىجاي اۋماعىن 3،5 گەكتارعا جەتكىزگەن. رەسەيگە جونەلتىلىپ جاتقان قياردىڭ 1 كەلىسى 250 تەڭگەنى قۇرايدى. كاسىپكەر سۇرانىسقا ساي جىلىجاي اۋماعىن ۇلعايتۋدى جوسپارلاپ وتىر.
وبلىس باسشىسى باسپانا كەزەگىندە تۇرعان ازاماتتارعا ارنالىپ سالىنعان ارىستاعى كوپقاباتتى تۇرعىن ۇيلەردى ارالاپ كوردى. «كوكتەم - 2» ىقشاماۋدانىنداعى جالپى اۋماعى 6 مىڭ شارشى مەتردى قۇرايتىن 36 پاتەرلىك 3 قاباتتى ۇيلەردىڭ قۇرىلىسى تولىق اياقتالعان. جاقىن كۇندەرى كوممۋنالدىق تۇرعىن ءۇي كەزەگىندە تۇرعان 100-دەن اسا وتباسىعا پاتەرلەر تابىستالادى. سونداي-اق، جىل سوڭىنا دەيىن تاعى 240 ارىستىق وتباسى باسپانالى بولادى. بۇگىندە مۇندا 4 بىردەي كوپقاباتتى ءۇيدىڭ قۇرىلىسى ءجۇرىپ جاتىر.
