Sonymen birge qajetti jihazdarmen jabdyqtalǵan tuz shahtasy, sensorlyq bólme, internet-kafe, ioga, ústel tennisi, biliard, shahmat, doiby oiyndary aimaqtary men kitaphana qyzmetin usynady. Zamanaýi úlgide jabdyqtalǵan, elimizde teńdesi joq ardagerler úiiniń ashylý saltanatyna Túrkistan oblysynyń ákimi Ómirzaq Shókeev qatysyp, qariialardyń qýanyshyna ortaqtasty.
– Sanadan eshqashan óshpeitin uly erlik, búgingi tynyshtyq besigin terbetken jeńimpaz jastardyń qairatyn janyp, bekemdigin bekite túsetindei. Atalar aibyny – izbasarlarǵa amanat! Urpaqtar sabaqtastyǵyn umytpai eske salyp otyratyn osy bir qos qýanysh barshamyz úshin de osynysymen qundy. Ardagerlerimiz aman, jastarymyz otanshyl bolsyn! Arystyq ardagerler úshin jasalǵan osyndai igi bastama, úlgi bolar is ári qarai ózge aimaqtarda jalǵasyn tabady dep senemin, – dedi oblys ákimi Ómirzaq Shókeev.
Ásem ǵimaratta qarttardyń bas qosyp, jiyn ótkizýlerine, tynyǵyp, shyǵarmashylyqpen ainalysýy úshin barlyq jaǵdailar jasalǵan. Terapevt dárigeri men emdik massaj bólimi jumys isteidi. Arys qalasyndaǵy 6 myńnan astam ardager úshin bul ortalyqtyń ashylýy úlken qýanysh. Sebebi buǵan deiin ardagerlerge arnalǵan mundai oryndar bolmaǵan. Aita ketý kerek, eki qabattan turatyn ardagerler ortalyǵy ǵimaratynyń bir bóligi "Neke saraiy" retinde óz jumysyn bastady. Oblys ákimi aqsaqaldarmen júzdesip, olardy Jeńis kúnimen quttyqtady. Shara barysynda sanitarlyq talaptar qatań saqtaldy.
Oblys basshysy baspana kezeginde turǵan azamattarǵa arnalyp salynǵan Arystaǵy kópqabatty turǵyn úilerdi aralap kórdi. «Kóktem - 2» yqshamaýdanyndaǵy jalpy aýmaǵy 6 myń sharshy metrdi quraityn 36 páterlik 3 qabatty úilerdiń qurylysy tolyq aiaqtalǵan. Jaqyn kúnderi kommýnaldyq turǵyn úi kezeginde turǵan 100-den asa otbasyǵa páterler tabystalady. Sondai-aq, jyl sońyna deiin taǵy 240 arystyq otbasy baspanaly bolady. Búginde munda 4 birdei kópqabatty úidiń qurylysy júrip jatyr.
