ناتيجەسىندە ەۋروپالىق قايتا قۇرۋ جانە دامۋ بانكى (ەققدب) فرانسۋزدىق Urbasolar SAS كومپانياسىنىڭ قازاقستانداعى كۇن ەلەكتر ستانساسىن (سەس) سالۋعا ارنالعان جوباسىن قولداۋ ءۇشىن 8،8 ملن. اقش دوللارى شاماسىندا نەسيە بولەتىن بولسا، ال تازا تەحنولوگيالار قورى جەڭىلدەتىلگەن 3،9 ملن. اقش دوللارى كولەمىندەگى قارجىمەن قامتاماسىز ەتپەك.
جوبانى «Kaz Green Tek Solar» ءجشس-نىڭ ارنايى جوبالىق كومپانياسى جۇزەگە اسىراتىن بولادى. ال ونىڭ نەگىزگى اكسيونەرى Urbasolar SAS كومپانياسى بولىپ تابىلادى.
جاڭا «زاداريا» كۇن ەلەكتر ستانساسى قازاقستاننىڭ ەنەرگەتيكالىق تەڭگەرىمىنە كۇن ەنەرگياسىن وندىرۋگە ارنالعان قۋاتتىلىقتى 14 مۆت-قا ارتتىرماق، سونىڭ ناتيجەسىندە قولدانىستاعى جانە جوسپارلانعان قالپىنا كەلەتىن ەنەرگيا گەنەراتورلارىنىڭ جالپى بەلگىلەنگەن قۋاتى 365 مۆت-قا جەتەتىن بولادى.
– ءبىز قازاقستان مەن ورتالىق ازيادا فوتوۆولتايكي تەحنولوگياسى ەلەكتر ەنەرگياسى وندىرىسىندە وتە ماڭىزدى ءرول اتقاراتىنىنا سەنىمدىمىز. بۇل جوبا كۇن قوندىرعىسىنىڭ تەحنيكالىق سيپاتتامالارى مەن ەكونوميكالىق تيىمدىلىگىن كورسەتەدى. ءبىز وسى جوبانى جۇزەگە اسىرۋ ءۇشىن 4 جىل بويى دايىندىق جۇمىستارىن جۇرگىزدىك، – دەدى Urbasolar SAS كومپانياسىنىڭ پرەزيدەنتى ارنو مين.
ايتا كەتەيىك، بۇگىندە وڭتۇستىك قازاقستان وبلىسىندا ەلباسىمىز بەكىتكەن «جاسىل ەكونوميكاعا كوشۋ» كونسەپسياسى ناتيجەلى ورىندالۋدا. اتالعان كونسەپسياعا ساي بىلتىرعى جىلى سايرام، قازىعۇرت اۋداندارىندا ەكى شاعىن سۋ ەلەكتر ستانسياسى ەل يگىلىگىنە بەرىلدى. سونداي-اق، شىمكەنت قالاسىنان ورتا ازيادا تەڭدەسى جوق بيوگاز قوندىرعىسى كەشەنى ىسكە قوسىلدى. بۇدان بولەك، سارىاعاش جانە ماقتاارال اۋداندارىندا ەكى ءىرى كۇن ەلەكتر ستانسيالارىنىڭ قۇرىلىس جۇمىستارى باستاۋ الدى. 2018 جىلى تولەبي اۋدانىندا قۋاتى 2،5 مەگاۆاتت شاعىن سۋ ەلەكتر ستانسياسى پايدالانۋعا بەرىلەدى دەپ كۇتىلۋدە. ودان بولەك، سارىاعاش اۋدانىندا جالپى قۋاتى 5 مەگاۆاتت شاعىن سۋ ەلەكتر ستانسياسى مەن وتىرار اۋدانىندا قۋاتى 35 مەگاۆاتت كۇن ەلەكتر ستانسياسىنىڭ قۇرىلىسىن جۇرگىزۋ جوسپارلانىپ وتىر.
وقو اكىمىنىڭ باسپا ءسوز قىزمەتى
