وقىس وقيعا كەشە ءتۇس اۋا حروم قوسىندىلارى زاۋىتىنىڭ №4 سەحىندا بولعان. اقتوبە وبلىستىق ەڭبەك ينسپەكسياسى باسشىسىنىڭ ورىنباسارى باۋىرجان ورازايەۆتىڭ ايتۋىنشا، وندىرىستە قولدانىلاتىن باكتىڭ ىشىندەگى حيميالىق قالدىقتى تازالاپ جاتقاندا ءبىر جۇمىسشى كۇيىپ قالعان. ونى قۇتقارماق بولىپ، بەس جۇمىسشى باكقا تۇسكەن. بارلىعى تەرميالىق كۇيىك العان. تورتەۋ قازا بولىپ، ەكەۋى اۋرۋحاناعا ءتۇستى.
اقتوبە وبلىستىق پوليسيا دەپارتامەنتىنىڭ باسشىسى ارىستان اتىعاي «الدىن الا تەرگەۋ سەح جۇمىسشىلارىنىڭ كولەمى 50 تەكشە مەترلىك باكتى تازالاپ جاتقان كەزدە قازا بولعانىن انىقتادى. اتالمىش فاكت بويىنشا «ابايسىزدا ەكى جانە ودان دا كوپ ادامنىڭ ولىمىنە اكەپ سوققان قاۋىپسىزدىك تەحنيكاسىنىڭ بۇزىلۋى» بابىمەن قىلمىستىق ءىس قوزعالدى»دەدى.
اۋرۋحانادا جاتقان ەكى جۇمىسشىنىڭ دا بەتى، موينى مەن قول-اياعى كۇيگەن. تىنىس الۋ جولدارى ءبۇلىنىپ، كۇيىكتەن شوك العان. اۋرۋحاناعا وتە اۋىر حالدە جاتقان جۇمىسشىلاردىڭ ءبىرى – 32 جاستا، ەندى ءبىرى – 36 جاستا.
حروم قوسىندىلارىن – ناتريي مونوحروماتى، ناتريي بيحروماتى، حروم انگيدريدى، حروم توتىعى، حروم مالماسى جانە كۇكىرتتى ناتريي – وندىرەتىن زاۋىت اقتوبە قالاسى اۋماعىندا ورنالاسقان. ءونىمى الەمنىڭ وتىزدان استام ەلىنە شىعارىلاتىن ۇلكەن كاسىپورىن.
