اقتوبە وبلىسىنىڭ ارنايى پروكۋرورلارى ينتەرنەت-دۇكەن ارقىلى پسيحوتروپتىق زاتتاردى بۇكىل ەل اۋماعىندا تاراتقان ۇيىمداسقان قىلمىستىق توپقا قاتىستى سوتقا دەيىنگى تەرگەپ-تەكسەرۋدى اياقتادى، دەپ حابارلايدى Dalanews.kz.

تەرگەۋ دەرەكتەرىنە سايكەس، «Qymyz shop» اتاۋىمەن جۇمىس ىستەگەن ينتەرنەت-دۇكەن Telegram مەسسەندجەرىندە «بايلانىسسىز قاتىسۋ» ۇلگىسىمەن ۇيىمداستىرىلعان. ال قارجى وپەراسيالارى «دروپپەرلەردىڭ» بانكتىك كارتالارى ارقىلى جۇرگىزىلگەن. ينتەرنەت-دۇكەننىڭ جالپى اينالىمى 50 ميلليون تەڭگەدەن اسقان.

جەدەل-تەرگەۋ ءىس-شارالارى بارىسىندا قاراعاندى، سولتۇستىك قازاقستان، اقتوبە وبلىستارى مەن استانا قالاسىنىڭ اۋماعىندا التى ادام انىقتالىپ، ۇستالدى. ولاردىڭ قولىنان 10 كيلوگراممنان استام پسيحوتروپتىق زات تاركىلەندى.

اتالعان فاكتىلەر بويىنشا قازاقستان رەسپۋبليكاسى قىلمىستىق كودەكسىنىڭ 262، 297 جانە 299-1-باپتارى بويىنشا (ۇيىمداسقان قىلمىستىق توپ قۇرۋ جانە وعان باسشىلىق ەتۋ، پسيحوتروپتىق زاتتاردى زاڭسىز ساقتاۋ، تاسىمالداۋ، وتكىزۋ، سونداي-اق ولاردى زاڭسىز جارنامالاۋ) سوتقا دەيىنگى تەرگەپ-تەكسەرۋ جۇرگىزىلدى.

قازىرگى تاڭدا قىلمىستىق ءىس ءمانى بويىنشا قاراۋ ءۇشىن سوتقا جولداندى.