اقتوبە وبلىسىندا تاعى دا جانتۇرشىگەرلىك جول اپاتى بولىپ، 5 شەتەلدىك قازا تاپتى، دەپ حابارلايدى Dalanews.kz.
7 جەلتوقساندا ساعات 08:40 شاماسىندا رەسپۋبليكالىق ماڭىزى بار سامارا–شىمكەنت تاسجولىنىڭ 1024-شاقىرىمىندا اۆتوبۋس اۋدارىلىپ كەتكەن.
"الدىن الا مالىمەت بويىنشا اۆتوبۋس جۇرگىزۋشىسى سامارا–شىمكەنت تاسجولىمەن قارابۇتاق اۋىلىنان قىزىلوردا وبلىسىنا قاراي كەلە جاتىپ، ايتەكەبي اۋدانىنا قاراستى ۇلعايسىن اۋىلىنىڭ ماڭىندا كولىك قۇرالىنىڭ قوزعالىس باعىتى بويىنشا وڭ جاققا اۋدارىلۋىنا جول بەرگەن. اۆتوبۋس سالونىندا پەرم–تاشكەنت باعىتىندا جول جۇرگەن وزبەكستان رەسپۋبليكاسىنىڭ 49 ازاماتى بولعان"، - دەدى پوليسيا.
جول اپاتى سالدارىنان 5 جولاۋشى وقيعا ورنىندا كوز جۇمدى، 11 جولاۋشى ءتۇرلى دەنە جاراقاتتارىمەن ايتەكەبي اۋداندىق اۋرۋحاناسىنا جەتكىزىلدى. قازىرگى تاڭدا جول-كولىك وقيعاسىنىڭ سەبەبى انىقتالىپ جاتىر.
