اقتوبە وبلىسىندا ءبىر تاۋلىك ىشىندە كوپقاباتتى ۇيلەردىڭ تەرەزەسىنەن ەكى كىشكەنتاي بالا قۇلاپ كەتتى، دەپ حابارلايدى Dala News.
پوليسيانىڭ مالىمەتىنشە، ەكى جاعدايدا دا بالالار بىرنەشە مينۋتقا قاراۋسىز قالعان. ولار ماساعا قارسى تورعا سۇيەنىپ، تومەنگە قۇلاعان.
«ەكى جاعدايدا دا بالالار بىرنەشە مينۋتقا عانا قاراۋسىز قالعان، ماساعا قارسى تورعا سۇيەنىپ، قۇلاپ كەتكەن. باقىتىمىزعا وراي، اۋىر زارداپتار بولعان جوق. ەستەرىڭىزدە بولسىن: اشىق تەرەزە – بالا ءۇشىن ءولىم ءقاۋپى. ماساعا قارسى تور قۇلاۋدان قورعامايدى. ءبىر ساتتىك بەيقامدىق قايعىلى جاعدايعا اكەلۋى مۇمكىن»، – دەدى اقتوبە وبلىسى پوليسيا دەپارتامەنتى قوعامدىق قاۋىپسىزدىك باسقارماسىنىڭ ەرەكشە تاپسىرمالار جونىندەگى اعا ينسپەكتورى رۋسلان ناۋرىزبايەۆ.
بەلگىلى بولعانداي، التى جاستاعى بالا ەسەت باتىر شاعىن اۋدانىندا ەكىنشى قاباتتان قۇلاعان. ال قاندىاعاش قالاسىندا ءتورت جاستاعى بالا ءۇشىنشى قاباتتان قۇلاپ كەتكەن.
ۆەدومستۆو دەرەگىنشە، بۇل – وڭىردە جىل باسىنان بەرى تىركەلگەن ءۇشىنشى وسىنداي جاعداي.
پوليسيا اتا-انالاردى بالالاردى قاراۋسىز قالدىرماۋعا جانە تەرەزە قاۋىپسىزدىگىنە ەرەكشە ءمان بەرۋگە شاقىردى.
