Aqtóbe oblysynda bir táýlik ishinde kópqabatty úılerdiń terezesinen eki kishkentaı bala qulap ketti, dep habarlaıdy Dala News.

Polısıanyń málimetinshe, eki jaǵdaıda da balalar birneshe mınýtqa qaraýsyz qalǵan. Olar masaǵa qarsy torǵa súıenip, tómenge qulaǵan.

«Eki jaǵdaıda da balalar birneshe mınýtqa ǵana qaraýsyz qalǵan, masaǵa qarsy torǵa súıenip, qulap ketken. Baqytymyzǵa oraı, aýyr zardaptar bolǵan joq. Esterińizde bolsyn: ashyq tereze – bala úshin ólim qaýpi. Masaǵa qarsy tor qulaýdan qorǵamaıdy. Bir sáttik beıqamdyq qaıǵyly jaǵdaıǵa ákelýi múmkin», – dedi Aqtóbe oblysy polısıa departamenti qoǵamdyq qaýipsizdik basqarmasynyń erekshe tapsyrmalar jónindegi aǵa ınspektory Rýslan Naýryzbaev.

Belgili bolǵandaı, alty jastaǵy bala Eset batyr shaǵyn aýdanynda ekinshi qabattan qulaǵan. Al Qandyaǵash qalasynda tórt jastaǵy bala úshinshi qabattan qulap ketken.

Vedomstvo dereginshe, bul – óńirde jyl basynan beri tirkelgen úshinshi osyndaı jaǵdaı.

Polısıa ata-analardy balalardy qaraýsyz qaldyrmaýǵa jáne tereze qaýipsizdigine erekshe mán berýge shaqyrdy.