اقتاۋدا كوماندير جاڭادان كەلگەن ساربازدىڭ باسىنان وتىرعىشپەن ۇرعان. سونداي-اق ول اسكەرگە شاقىرىلعانداردىڭ باسىنان تاياقپەن ۇرعان. زارداپ شەككەن اسكەريلەر كومانديرىن كەشىرىپ، وعان قاتىستى قىلمىستىق ءىس سوتتا توقتاتىلدى، - دەپ حابارلايدى Dalanews.kz "دياپازونعا" سىلتەپ.
باسىلىم مالىمەتىنشە، اقتاۋدا ورنالاسقان 25744 اسكەري ءبولىمىنىڭ اسكەري قىزمەتكەرى قىزمەت بابىن اسىرا پايدالاندى دەپ ايىپتالعان.
"مىسالى ول جاڭادان كەلگەندەردى جيناپ، بىرەۋىنىڭ باسىنان اعاش دۋبينكامەن ۇرعان. جاس سارباز كومانديردىڭ تەگىن دۇرىس ايتپاعانى ءۇشىن بىرنەشە سوققى جەگەن. باسقا دا ساربازداردى دۋبينكامەن ۇرعان"، - دەلىنگەن ماتەريالدا.
تاعى ءبىر وقيعادا اسكەري قىزمەتكەر ساپقا كەشىگىپ كەلگەن ساربازدىڭ بەتىنەن جۇدىرىقپەن ۇرىپ جىبەرگەن. ارتىنشا ونى دا باسىنان وتىرعىشپەن ۇرىپ جىبەرگەن. بىرنەشە سوققى جەگەن سارباز باسىنان ۇستاپ وتىرىپ قالعان، الايدا كوماندير مۇنىمەن توقتاماي، ۇرۋىن جالعاستىرعان. تاعى ءبىر ساربازدىڭ ءتىسىن قاعىپ العان.
"ەڭ قىزىعى مىنادا. تەرگەۋ بارىسىندا بەس سارباز جابىرلەنۋشى دەپ تانىلعان. ءبىراق ولار كومانديرگە كەشىرىم بەرىپ، ەكى جاق تاتۋلاسقانى تۋرالى ارىز جازعان. ايىپتالۋشىنىڭ ءوزى كىناسىن مويىنداپ، جابىرلەنۋشى تاراپپەن تاتۋلاسقانىن ايتقان"، - دەپ جازىلعان ماتەريالدا.
ناتيجەسىندە اقتوبە گارنيزونى اسكەري سوتى تاراپتاردىڭ تاتۋلاسۋىنا بايلانىستى قىلمىستىق ءىستى توقتاتقان. سوت ۇكىمى زاڭدى كۇشىنە ەنگەن جوق.
