Aqtaýda komandir jańadan kelgen sarbazdyń basynan otyrǵyshpen urǵan. Sondai-aq ol áskerge shaqyrylǵandardyń basynan taiaqpen urǵan. Zardap shekken áskeriler komandirin keshirip, oǵan qatysty qylmystyq is sotta toqtatyldy, - dep habarlaidy Dalanews.kz "Diapazonǵa" siltep.
Basylym málimetinshe, Aqtaýda ornalasqan 25744 áskeri bóliminiń áskeri qyzmetkeri qyzmet babyn asyra paidalandy dep aiyptalǵan.
"Mysaly ol jańadan kelgenderdi jinap, bireýiniń basynan aǵash dýbinkamen urǵan. Jas sarbaz komandirdiń tegin durys aitpaǵany úshin birneshe soqqy jegen. Basqa da sarbazdardy dýbinkamen urǵan", - delingen materialda.
Taǵy bir oqiǵada áskeri qyzmetker sapqa keshigip kelgen sarbazdyń betinen judyryqpen uryp jibergen. Artynsha ony da basynan otyrǵyshpen uryp jibergen. Birneshe soqqy jegen sarbaz basynan ustap otyryp qalǵan, alaida komandir munymen toqtamai, urýyn jalǵastyrǵan. Taǵy bir sarbazdyń tisin qaǵyp alǵan.
"Eń qyzyǵy mynada. Tergeý barysynda bes sarbaz jábirlenýshi dep tanylǵan. Biraq olar komandirge keshirim berip, eki jaq tatýlasqany týraly aryz jazǵan. Aiyptalýshynyń ózi kinásin moiyndap, jábirlenýshi tarappen tatýlasqanyn aitqan", - dep jazylǵan materialda.
Nátijesinde Aqtóbe garnizony Áskeri soty taraptardyń tatýlasýyna bailanysty qylmystyq isti toqtatqan. Sot úkimi zańdy kúshine engen joq.
