قازاقستاندىق لوۋكوستەر FlyArystan 2025 جىلدىڭ 29 قاراشاسىنان باستاپ اقتاۋ – دۋباي – اقتاۋ باعىتىندا رەيس اشادى، دەپ حابارلايدى Dalanews.kz.
العاشقى كەزەڭدە رەيستەر اپتاسىنا ءبىر رەت – سەنبى كۇندەرى ورىندالادى.
"16 جەلتوقسان مەن 6 قاڭتار ارالىعىنداعى قىسقى مەكتەپ دەمالىسى كەزەڭىندە، سونداي-اق، 10–24 ناۋرىز ارالىعىنداعى كوكتەمگى مەرەكەلەردە سەيسەنبى كۇندەرى قوسىمشا رەيستەر ورىندالادى. كۇندىزگى كەستە بۇل باعىتتى وتباسىلىق ساياحاتتار مەن مەرەكەلىك ساپارلار ءۇشىن ەرەكشە ىڭعايلى ەتەدى"، - دەلىنگەن كومپانيا حابارلاماسىندا.
ۇشۋ ۋاقىتىنىڭ ورتاشا ۇزاقتىعى 3،5 ساعاتتى قۇرايدى.
ەسكە سالايىق، قازاقستان ازاماتتارى ءۇشىن بىرىككەن اراب امىرلىكتەرىندە 30 كۇنگە دەيىن ۆيزاسىز ءجۇرۋ رەجيمى قولدانىلادى.
