اقتاۋداعى ۇشاق اپاتىنان 12 ادام امان قالدى. بۇل تۋرالى ماڭعىستاۋ وبلىسىنىڭ دەنساۋلىق ساقتاۋ باسقارماسى مالىمدەدى، دەپ حابارلايدى Dalanews.kz.
“ۇشاق اپاتقا ۇشىراعان جەردەن اقتاۋداعى ماڭعىستاۋ وبلىستىق اۋرۋحاناسىنا 12 ادام (ولاردىڭ ءبىرى بالا) ءتۇرلى جاراقاتتارمەن جەتكىزىلدى. بورتتا ەكيپاج مۇشەلەرىن قوسقاندا 67 ادام بولدى. جەرگىلىكتى جەردە 14 جەدەل جاردەم بريگاداسى جۇمىس ىستەپ جاتىر، - دەلىنگەن حابارلامادا.
ايتا كەتەيىك، بۇعان دەيىن دەنساۋلىق ساقتاۋ ءمينيسترى اقمارال ءالنازاروۆا امان قالعان جولاۋشىلاردىڭ جاعدايىنا بايلانىستى تۇسىنىكتەمە بەرگەن ەدى.
"امان قالعانداردىڭ بارلىعى اۋىر حالدە. ۇشاق قۇلاعان جەردە 14 جەدەل جاردەم بريگاداسى جۇمىس ىستەپ جاتىر"، - دەيدى مينيستر.
ەسكە سالايىق، بۇگىن، 25 جەلتوقساندا اقتاۋ ماڭىندا ۇشاق قۇلادى. وسىعان بايلانىستى تجم تۇسىنىكتەمە بەرگەن بولاتىن.
"اقتاۋدا ۇشاق قۇلاعان ورىنعا قازاقستان تجم جەكە قۇرامىنان 52 ادام جانە 11 بىرلىك تەحنيكاسى باردى. وقيعا ورنىنا كەلگەن بويدا اۋە كەمەسى جانىپ جاتتى. قۇتقارۋ بولىمشەلەرى ءورتتى سوندىرۋگە كىرىستى".
"قازاەروناۆيگاسيا" اقپاراتىنشا، باكۋ-گروزنىي باعىتى بويىنشا كەلە جاتقان "ەمبراير190" AHY8243 ۇشاعى اقتاۋدا قۇسپەن سوقتىعىسقان.
ال ازەربايجاندىق باق-تىڭ حابارلاۋىنشا، بورتتا 67 ادام مەن 5 ەكيپاج مۇشەسى بولعان.
