قازاقستان ۇلتتىق قاۋىپسىزدىك كوميتەتى "اقتاۋ حالىقارالىق تەڭىز ساۋدا پورتى" اكسيونەرلىك قوعامىنىڭ باسقارما ءتوراعاسى اباي تۋرىكپەنبايەۆتىڭ ۇستالعانىن راستادى، دەپ حابارلايدى Dalanews.kz.
بۇل اقپاراتتى كۋرسيۆ باسىلىمى مالىمدەدى.
ۆەدومستۆونىڭ مالىمەتىنشە، وعان قاتىستى ق ر قىلمىستىق كودەكسىنىڭ 361-بابى – "قىزمەتتىك وكىلەتتىكتى اسىرا پايدالانۋ" بويىنشا سوتقا دەيىنگى تەرگەۋ امالدارى جۇرگىزىلىپ جاتىر. تەرگەۋ مۇددەسىنە بايلانىستى وزگە اقپارات جاريا ەتىلمەيدى.
اباي تۋرىكپەنبايەۆ 2017 جىلدان بەرى اقتاۋ حالىقارالىق تەڭىز ساۋدا پورتىن باسقارىپ كەلەدى. ول 1964 جىلى 4 ماۋسىمدا شىمكەنت قالاسىندا دۇنيەگە كەلگەن. قازان حيميا-تەحنولوگيالىق ينستيتۋتىن جانە ەۋرازيالىق نارىق ينستيتۋتىن ءتامامداعان.
ەسكە سالايىق، بۇعان دەيىن قازاقستاننىڭ باتىسىنداعى "اقتاۋ تەڭىز ساۋدا پورتى" ۇلتتىق كومپانياسىنىڭ پرەزيدەنتى ۇستالعانى تۋرالى حابار تاراعان ەدى.
بۇل تۋرالى "قازاقپارات" ءوز دەرەككوزىنە سىلتەمە جاساپ حابارلادى. قازىرگى ۋاقىتتا پورت باسشىسى تەرگەۋ يزولياتورىندا وتىر. باسىلىمدا وزگە مالىمەتتەر ناقتىلانباعان.
پورتتىڭ باسپا ءسوز قىزمەتى بۇل دەرەككە ءالى جاۋاپ بەرمەنەن.
رەسمي سايتتاعى دەرەكتەرگە سۇيەنسەك، قازىرگى پرەزيدەنت بۇل لاۋازىمعا 2017 جىلى تاعايىندالعان.
Orda.kz مالىمەتتەرىنشە، اڭگىمە "اقتاۋ حالىقارالىق تەڭىز ساۋدا پورتى" پرەزيدەنتى اباي تۇرىكپەنبايەۆ تۋرالى بولىپ وتىر. تەرگەۋدى ۇقك جۇرگىزىپ جاتىر.
اقتاۋ تەڭىز ساۋدا پورتى كاسپيي تەڭىزىنىڭ شىعىس جاعالاۋىندا، حالىقارالىق كولىك دالىزدەرىنىڭ توعىسقان تۇسىندا ورنالاسقان. پورت يران، تۇركيا، رەسەي، ازەربايجان ەلدەرىمەن باعىتتالعان تاسىمالدى قامتاماسىز ەتەدى. سونىمەن قاتار، تۇرىكمەنستانمەن دە جۇك اينالىمى بار. كاسىپورىن جىل بويى تاۋلىك بويى جۇمىس ىستەيدى.
