2025 جىلعى 5 اقپاندا ىزدەستىرۋ جاريالانعان اقتاۋ قالاسى اكىمىنىڭ بۇرىنعى ورىنباسارى تيمۋر ءسادۋاقاسوۆ وزبەكستاندا ۇستالعانى تۋرالى اقپارات پايدا بولدى. بۇل تۋرالى جەلىدە جۋرناليست ميحايل كوزاچكوۆ جازدى. ءبىراق بۇل مالىمەت رەسمي تۇردە ءالى راستالعان جوق، دەپ حابارلايدى Dalanews.kz.
"اقتاۋ اكىمىنىڭ بۇرىنعى ورىنباسارى تيمۋر سادۋاقاسوۆ قازاقستاننان قىرعىزستانعا، كەيىن وزبەكستانعا زاڭسىز وتكەن. سول جەردە ونى جەرگىلىكتى شەكاراشىلار ۇستاعان. سادۋاقاسوۆ وزبەكستان شەكاراسىن زاڭسىز كەسىپ وتكەنى ءۇشىن 5 جىلدان 10 جىلعا دەيىن سوتتالۋى مۇمكىن"، دەلىنگەن Kozachkov offside تەلەگرام ارناسىندا.
ال قازاقستاندا وعان الاياقتىق جانە پارا بەرۋگە يتەرمەلەۋ بويىنشا ايىپ تاعىلىپ، حالىقارالىق ىزدەۋ جاريالانعان.
2019 جىلى اقپاننان باستاپ اقتاۋ قالاسى اكىمىنىڭ ورىنباسارى بولعان تيمۋر ءسادۋاقاسوۆقا ىزدەۋ جاريالانعانى 2025 جىلى 7 اقپاندا بەلگىلى بولدى. "2025 جىلعى 5 اقپاندا ىزدەستىرۋ تۋرالى ءىس سولتۇستىك قازاقستان وبلىسىندا تىركەلدى. باستاماشى — سوت. ىزدەستىرۋدى جۇرگىزەتىن ورگان: قازاقستان رەسپۋبليكاسى قارجى مونيتورينگى اگەنتتىگىنىڭ سولتۇستىك قازاقستان وبلىسى بويىنشا ەكونوميكالىق تەرگەۋ دەپارتامەنتى"، — دەپ جازىلعان ءسادۋاقاسوۆتى ىزدەستىرۋ كارتوچكاسىندا.
تيمۋر ءسادۋاقاسوۆ سولتۇستىك قازاقستان وبلىسىنداعى تيتان-سيركونيي كەندەرىن ءوندىرۋشى وبۋحوۆ تاۋ-كەن بايىتۋ كومبيناتىنا قاتىستى اتىشۋلى ىستە فيگۋرانت ەكەنى بەلگىلى. 2025 جىلعى قاڭتاردا اپەللياسيالىق ساتى بۇل ءىس بويىنشا اقتاۋ ۇكىمىنىڭ كۇشىن جويدى، سوتتالۋشىلار قاماۋعا الىندى، ءبىراق تيمۋر ءسادۋاقاسوۆتىڭ بۇل كەزدە ەلدە بولماعان.
