وسى قۋانىشتى وقيعامەن زاۋىت ۇجىمى مەن شارۋالاردى وبلىس اكىمىنىڭ ورىنباسارى سەرىكجان بەسكەمپىروۆ قۇتتىقتادى. ءوز سوزىندە س. بەسكەمپىروۆ زاۋىتتىڭ قانت قىزىلشاسىن العاش قابىلداۋ قىزىلشاشىلار ءۇشىن دە، وڭدەۋشىلەر ءۇشىن دە، جەرگىلىكتى حالىق ءۇشىن دە ەرەكشە وقيعا ەكەنىن اتاپ ءوتتى. ون جىل بويى تۇرالاپ قالعان اقسۋ قانت زاۋىتىنىڭ قالاقۇراۋشى كاسىپورىن مارتەبەسىن قايتا جاڭعىرتاتىن كۇنى دە الىس ەمەس. ال زاۋىتتىڭ ىسكە قوسىلۋى جاڭا جۇمىس ورىندارىنىڭ اشىلۋىنا جانە ساپالى قانت ءوندىرۋ ءىسىن ىلگەرىلەتۋگە ىقپال ەتپەك.
ەسكە سالساق، قازىرگى كەزدە اقسۋ قانت زاۋىتىن قالپىنا كەلتىرۋ جۇمىستارىنىڭ نەگىزگى بولىگى اياقتالدى. قىزىلشا جيناقتاۋ الاڭى عانا ەمەس، بارلىق سەحتارى جۇمىسقا دايىن، جاڭا قۇرال-جابدىقتار ورناتىلعان، بارلىق تەحنولوگيالىق پروسەستەر اۆتوماتتاندىرىلادى. ازىرگە مۇندا 100 ادام جۇمىسقا تارتىلعان، دەگەنمەن زاۋىت تولىق ىسكە قوسىلعاندا مۇنداعى ماماندار سانى 650-گە جەتكىزىلمەك. وندىرىستىك قۋاتىنا ساي ماۋسىمىنا 300 مىڭ توننا شيكىزات وڭدەي الادى. ال دايىن ءونىمنىڭ كولەمى 32-35 مىڭ توننا بولادى دەپ جوسپارلانىپ وتىر. اقسۋ قانت زاۋىتىن شيكىزاتپەن نەگىزىنەن اقسۋ، سارقان، الاكول اۋداندارىنىڭ قانت وسىرۋشىلەرى قامتاماسىز ەتپەك.
الماتى وبلىسى اكىمىنىڭ باسپا ءسوز قىزمەتى
https://dalanews.kz/30284
