اقش-تاعى قالىڭ قار مەن بوراننىڭ اۋرەسى باسىلماي تۇر. ءتىپتى، قارلى بوراندا 45 ادام قازا تاپقان، دەپ حابارلايدى Dalanews.kz
AP مالىمەتىنشە، قازا بولعانداردىڭ اراسىندا تەحاستا مۇز استىنا ءتۇسىپ كەتكەن ءۇش بالا، سونداي-اق نيۋ-يورك كوشەلەرىنەن تابىلعان ون ادام بار. اگەنتتىك مالىمەتىنشە، بۇل وقيعالار قوعامدا بيلىك ورگاندارىنىڭ ارەكەتىنە، اسىرەسە مەر زوحران ءمامدانيدىڭ حالىقتىڭ وسال توپتارىن قورعاۋ ءۇشىن قابىلداعان شارالارىنا قاتىستى قىزۋ پىكىرتالاس تۋعىزدى.
سەيسەنبى كەشىندەگى جاعداي بويىنشا 448 مىڭنان استام تۇرعىن ءۇي مەن كاسىپورىن ەلەكتر قۋاتىنسىز قالدى. ەلەكتر جارىعىنىڭ ءوشۋىنىڭ جارتىسىنان كوبى تەننەسسي مەن ميسسيسيپي شتاتتارىندا تىركەلگەن.
اقش-تىڭ ۇلتتىق مەتەورولوگيالىق قىزمەتى جۇما جانە سەنبى كۇندەرى ەلدىڭ شىعىس بولىگىندە اركتيكالىق سۋىقتىڭ كۇشەيەتىنىن بولجاپ وتىر. دەمالىس كۇندەرى جاڭا قىسقى داۋىل سوعىپ، ەلدىڭ وڭتۇستىگىندە، ونىڭ ىشىندە فلوريدادا دا رەكوردتىق دەڭگەيدە تومەن تەمپەراتۋرالار كۇتىلەدى.
