اقش-تاعى قارلى بوران سالدارىنان قازا تاپقاندار سانى 30-عا جەتتى، دەپ حابارلايدى Dalanews.kz.
قازا بولعانداردىڭ قاتارىندا ماسساچۋسەتس پەن وگايو شتاتتارىندا قار تازالاۋ تەحنيكاسى قاعىپ كەتكەن ەكى ادام، اركانزاس پەن تەحاستا شانامەن سىرعاناۋ كەزىندە اۋىر جاراقات الىپ كوز جۇمعان جاسوسپىرىمدەر، سونداي-اق كانزاس شتاتىنىڭ ەمپوريا قالاسىندا قار استىنان تابىلعان ايەل بار.
دۇيسەنبى كەشىنە قاراي 630 مىڭنان استام حالىق جارىقسىز قالعان. ەل كولەمىندە 12 مىڭنان اسا اۋە رەيسى كەيىنگە شەگەرىلىپ نەمەسە مۇلدە توقتاتىلعان.
ۇلتتىق مەتەورولوگيالىق قىزمەتتىڭ بولجامىنشا، اياز الداعى كۇندەرى دە ساقتالادى. اركتيكالىق سۋىق اۋانىڭ جاڭا لەگى كەلىپ، زارداپ شەككەن وڭىرلەردە سۋىقتى ودان ءارى كۇشەيتەدى.
بۇدان بولەك، سينوپتيكتەر الداعى دەمالىس كۇندەرى اقش-تىڭ شىعىس جاعالاۋىنا اسەر ەتۋى مۇمكىن جاڭا قىسقى داۋىلدىڭ قالىپتاسۋ ىقتيمالدىعىن دا جوققا شىعارماي وتىر.
