ءاقنار گۇلستان ىسىندە ەسىمى اتالعان قىز جۇرت الدىنا شىعىپ، مالىمدەمە جاسادى، دەپ حابارلايدى Dalanews.kz.
21 جاستاعى رانا ەسىمدى قىزدىڭ ايتۋىنشا، ءاقنار گۇلستاننىڭ اناسىنىڭ مالىمدەمەلەرى شىندىققا جاناسپايدى.
"ءاقنار گۇلستاننىڭ اناسى مەنى جانە ديدار دەگەن كىسىنى ولتىرۋشىلەر دەپ ايتىپ جاتىر. ءبىراق بۇل شىندىققا سايكەس كەلمەيدى. ول شىندىق ەمەس"، - دەدى ول.
ونىڭ سوزىنشە، ۇشەۋى دە قازاقستانداعى بەلگىلى ۋنيۆەرسيتەت قابىرعاسىندا تانىسقان، اقنارمەن ءبىر كۋرستا وقىعان.
"ارامىزدا ەشقانداي كەلىسپەۋشىلىك بولعان جوق. دوستىعىمىز وتە جاقىن بولدى. تۋعان كۇن وتكىزسەم ولار كەلەتىن"، - دەدى ول.
رانا بىلتىر اناسى كوز جۇمىپ، سونىڭ سالدارىنان كۇيزەلىسكە تۇسكەنىن ايتتى. ونىڭ سوزىنشە، كەيىن ەكى قىز حابارلاسىپ، ونىڭ كوڭىلىن سۇراپ كەلگەن.
"18 شىلدەدە ءاقنار مەن ديدار حابارلاسىپ، "كوڭىل سۇراپ جينالايىق" دەدى. ەكەۋى مەنى ءبىر مەيرامحاناعا شاقىردى. سول مەيرامحانادا تاماقتاندىق. وتە كوپ تاماق تاپسىرىس بەرگەندىكتەن، تاماق قالدى. كەيىن "ديداردىڭ ۇيىنە جينالايىق" دەپ شەشىم قابىلدادىق. 2024 جىلى 19 شىلدەدە كەشكى ساعات 20.40-تا ديداردىڭ ۇيىنە كەلدىك. ءاقنار ىشىمدىك ساتىپ الۋدى ءبىرىنشى ءوزى ۇسىندى. ءبىز دە كەلىستىك. كوڭىل كۇيىمىزدى كوتەرەيىن دەپ سىرا، شامپان جانە سودجۋ تاپسىرىس بەردىك. "مەن ءدارى قابىلداپ ءجۇرمىن، ازداپ ىشەمىن" دەدىم. ۇشەۋمىز تاماقتاندىق، قىزدار سىرا ءىشتى. مەن اۋىرىپ جۇرگەندىكتەن شامپان ءىشتىم. كەيىن مۋزىكا قويىپ، بيلەدىك. ديدار ونى ۆيدەوعا تۇسىرگەن"، - دەدى قىز.
ونىڭ سوزىنشە، پوليسيا ىشىمدىككە بايلانىستى ساراپتاما جۇرگىزگەندە وزىنەن 0 دەگەن، ديدار ەسىمدى قىزدان 0،003 دەگەن ناتيجە شىعارعان. ەسىرتكى بويىنشا دا ساراپتاما الىنىپ، تەرىس ناتيجە شىعارعان.
"ءاقنار جايمەن ۇيىقتاپ باستايدى. سول كەزدە ءبىز "تەلەفونىڭنىڭ ءقۇپياسوزىن ايتشى، ۇيىڭدەگىلەرگە حابارلاسايىق" دەدىك. ءاقنار ءقۇپياسوزىن بەردى. ءبىز ءۇي ىشىنە حابارلاسقىمىز كەلدى. ءبىراق مەن "ۇيىقتاپ جاتىر عوي، ءارى قاراي دا ۇيىقتاي بەرسىن، ەرتەڭ ۇيىنە قايتار" دەدىم. ءبىز زالدا وتىردىق، ديدار ەكەۋمىز اڭگىمە ايتىپ وتىردىق. ءبىر كەزدە ءاقنار كەنەت تۇرىپ، شىڭعىرىپ باستادى. ەكى كوزى قىپ-قىزىل. شوشىپ كەتتىم. جۇگىرىپ باردىم. "نە بولدى؟" دەدىم. ول مەنى شاپالاقپەن ۇرىپ، قۇلاتتى. ديدار دا شوشىپ، اقنارگە باردى، ونى دا شاپالاقپەن ۇردى. بىردەڭە دۇرىس ەمەس ەكەنىن بىلدىك. ول باستاپ وز-وزىنە قول جۇمساعىسى كەلدى، ءبىز ونى ۇستادىق. ول شىڭعىرىپ باستايدى، ءبىز تىنىشتاندىرامىز. ول ءبىزدى ۇرعىسى كەلدى. ماعان "سەنىڭ اناڭ توزاقتا" دەدى. تۇسىنبەي قالدىم. اكەمدى ايتىپ، بۇكىل وتباسىمدى قارعاپ باستايدى. "قاتە، قاتە" دەپ ايتتىم. ونىڭ اۋزىن جاۋىپ وتىردىم، جىلاپ وتىردىم. ول سۇرە وقىپ باستايدى. "جىن كىرگەن سياقتى" دەپ قالدىق"، - دەيدى ۆيدەودا قىز.
ونىڭ سوزىنشە، ءاقنار وزىنە شابۋىل جاساپ، باسىنان، دەنەسىنەن ۇرعان، بەتىنەن تىرناعان.
"سول ساتتە ديدار دارەتحاناعا قاشتى. اعاسىنا اۋديو جىبەرەدى. "ءاقنار قاسىمىزداعى ءبىر قىزدى ولتىرەيىن دەپ جاتىر" دەيدى. ول تۇسىنۋگە وتە وڭاي. "ءبىزدىڭ قاسىمىزداعى ءبىر قىزدى ءولتىرىپ جاتىر" دەيدى"، - دەدى رانا.
ول كەيىن اس بولمەسىنە قاشقانىن، ءاقنار ارتىنان جۇگىرىپ كەلگەنىن، ءوزىن ۇرىپ-سوققانىن ايتادى.
"كەيىن جۇگىرىپ، ءۇيدىڭ ەكىنشى دارەتحاناسىنا بارىپ، تىعىلدىم. دىرىلدەپ وتىردىم. مۇنداي جاعداي ومىرىمدە بولىپ كورگەن جوق. ءاقنار سەكىرىپ كەتەتىنىن ويلامادىم. دارەتحانادا 3-5 مينۋت وتىردىم، بىرەۋ ەسىكتى قاقتى. ديداردىڭ داۋسىن ەستىدىم. مەنەن "ءاقنار قايدا؟" دەپ سۇرادى. "ءاقنار اس بولمەدە" دەدىم. اس بولمەسىنە بارساق جوق ەكەن. ءبىر جەرگە تىعىلىپ قالعان شىعار دەدىم. زالدا دا بولمادى. زالدى قاراپ جاتقان كەزدە پوليسيا ەسىك قاقتى. ەسىكتى اشقاندا "سىزدەردىڭ پاتەرلەرىڭىزدەن ءبىر قىز قۇلاپ ءتۇستى" دەيدى. سول كەزدە سەنبەدىم. وزىنە قول جۇمسايدى دەگەن وي بولمادى. ىشپەگەن كەزدە جاقسى قىز بولدى، ماقساتى بولدى. سەكىرگەنىن ەستىگەن كەزدە تاڭعالدىم"، - دەيدى ۆيدەوداعى قىز.
ەسكە سالايىق، الماتىدا 2024 جىلى 20 شىلدەدە ءاقنار گۇلستان كوپقاباتتى تۇرعىن ءۇيدىڭ جەتىنشى قاباتىنان قۇلاپ، قايتىس بولعان. تەرگەۋ بۇل وقيعانى "ءوزىن-وزى ءولتىرۋ" بابىمەن تىركەگەن. الايدا جاقىندارى ءاقناردىڭ جەتىنشى قاباتتان قۇلاپ كەتكەنىنە سەنبەيدى. ولاردىڭ سوزىنشە، مارقۇم قازا تاپقانعا دەيىن دەنەسىندە ازاپتاۋ بەلگىلەرى بولعان.
كەيىنىرەك مارقۇمنىڭ اناسى گۇلستان قاميت الماتى قالالىق تەرگەۋ ورگاندارى مەن پروكۋراتۋراسى بۇل ءىستى جەڭىل باپپەن وزىنە ءوزى قول جۇمساۋعا يتەرمەلەۋ دەپ باعالاپ، شىنايى تەرگەۋ جۇرگىزبەي وتىرعانىن مالىمدەدى.
ال الماتى قالالىق پد مالىمەتىنشە، تەرگەۋ باسقارماسى بىلتىر شىلدەدە الماتى تۇرعىنىنىڭ ولىمىنە قاتىستى قىلمىستىق ءىس قوزعاعان.
